Миланда Алексей Навалнийга ёдгорлик ўрнатилди

16 март, якшанба куни Миланда россиялик мухолиф сиёсатчи Алексей Навалнийга ёдгорлик очилди. У шаҳарнинг асосий кўчаларидан бири — Корсо Комода, 2006 йилда Москвада ўлдирилган россиялик журналист Анна Политковская номи билан аталган боғда ўрнатилган.

Ёдгорлик гранит куб бўлиб, устига лавҳа туширилган ва унда Навалнийнинг италян тилида: «Агар мени ўлдиришса, таслим бўлманг» деган сўзлари ўйиб ёзилган. Ёдгорлик Навалний хотирасига шаҳар томонидан эҳтиром экани қайд этилган. Сиёсатчининг исми ва фамилияси остида шундай дейилган: «Россия мухолифати етакчиси 2024 йил 16 февралда қамоқда вафот этди».

Очилиш маросимида Милан шаҳар кенгаши раҳбари Елена Бушеми ва шаҳар ҳокимиятининг бошқа вакиллари, шунингдек, Навалнийнинг қизи Даря ҳамда сиёсатчининг сафдошлари иштирок этди.

«Менинг отам жуда кучли одам эди. Сиз учун у ақл бовар қилмайдиган етакчи ва илҳомлантирувчи куч эди, лекин мен учун у ҳам меҳрибон, ҳазилкаш ва меҳрибон дада эди», деди Даря Навалная инглиз тилида йиғилганларга мурожаат қилиб.

Юлия Навалная эри номидаги сиёсий мукофот ҳақида эълон қилди

16 феврал куни, турмуш ўртоғи ва сиёсатчи Алексей Навалний вафотининг бир йиллиги муносабати билан Юлия Навалная унинг номига йиллик мукофот таъсис этилишини эълон қилди. Навалнийнинг беваси Берлиндаги Кайзер Вилгелм мемориал черковида: «Бу ёш сиёсатчилар, оммавий ташаббуслар учун мукофот бўлади», деди. Сиёсатчи хотирасига ҳурмат бажо келтириш учун у ерда 500 га яқин одам йиғилди, деб хабар беради DW мухбири.

2024 йил август ойида Россия ва Ғарб ўртасидаги кенг кўламли маҳбус алмашинуви доирасида Россия қамоқхоналаридан озод этилган сиёсатчилар Иля Яшин ва Андрей Пивоваров черковда навбатда туришди.

Хотира кечасида сўзга чиққан Юлия Навалная ўзининг сиёсий вазифасини «Владимир Путин режими имкон қадар тезроқ тугатилиши»ни таъминлашда кўришини айтди. «Мен қайтишни орзу қиламан», деди у.

Аввалроқ Берлиндаги Россия элчихонаси олдида ўнлаб одамлар урушга қарши митинг ўтказган эди.