Президент Марказий банкнинг Самарқанд вилояти бош бошқармаси раҳбарини ишдан олиш бўйича топшириқ берди

Самарқанд халқаро аэропортининг янги терминалида президент Шавкат Мирзиёев иштирокида вилоят фаоллари йиғилиши бўлиб ўтмоқда.

Йиғилиш танқидий руҳда бошланган. Банкларда коррупция эвазига кредит бериш ҳолатлари кўплиги ҳамда қайтарилмаётган кредитлар ҳажми юқорилиги таъкидланган. «Миллий банк», «Халқ банки» ва «Асака банк»даги ҳолатлар бўйича жиноий иш очилиши айтилган.

«Биз ислоҳотлар қиляпмиз. Одамлар ҳаётини яхшилаш учун қарорлар чиқариляпти. Халқимиз олдида, халқаро ҳамжамият олдида очиқлик, эркинликни таъминлаш учун ҳаракатдамиз. Одамларни рози қилиш ҳақида гапириб турганимда раҳбарларнинг ўзини ўйлаб, нопок ишлар қилишига йўл қўймайман», дея президентнинг сўзларини келтиради «Микрофон кўтарган аёл» канали.

Шавкат Мирзиёев Марказий банкнинг Самарқанд вилояти бош бошқармаси бошлиғи Отабек Тўхтаевни ишдан олиш бўйича топшириқ берган. Тўхтаев бу лавозимда 2020 йилнинг апрелидан буён ишлаб келаётганди.

Шунингдек, вилоятнинг бир неча туман ҳокимлари ва сектор раҳбарлари мансабни суиистеъмол қилгани, фаолиятида коррупция ҳолатлари аниқлангани учун ишдан олинган.