Боғдодда кўп қаватли уйдаги хонадонда қулфланиб қолган ёш бола қутқарилди

Фарғона вилояти Боғдод туманида кўп қаватли уйлардан бирида қулфланиб қолган бола туман ФВБ ходимлари томонидан қутқарилган. Бу ҳақда вилоят Фавқулодда вазиятлар бошқармаси хабар қилди.

Қайд этилишича, Боғдод тумани ФВБ навбатчилик қисмига соат 9:34да Маърифат кўчаси хонадонларининг бирида ёлғиз бола қулфланиб қолгани тўғрисида хабар келиб тушган.

Маълум бўлишича, она қўшниникига чиқиб кетган пайтда бола ўзи билмаган ҳолда эшикни ичкаридан қулфлаб қўйган. Хонадон ичкарисида телефони қолиб кетган она қўшни уйда ишлаётган усталар телефонидан ФВБга алоқага чиқиб ёрдам сўраган.

Туман ФВБ қутқарувчилари айтилган манзилга 9:40да етиб борган. Махсус асбоб-анжомлар билан фуқаро уйининг ойнасидан кириб болага ёрдам кўрсатилган ва яқинларига соғ-омон топширилган.