Навоийда аҳолига тарқатилиши керак бўлган 10 тонна ун “адашиб” новвойхонага туширилди

Зарафшон шаҳридаги Қурувчи маҳалласи аҳолисига тарқатилиши керак бўлган ун манзилга етиб бормасдан, Навоий шаҳридаги новвойхоналардан бирининг омборхонасига туширилгани аниқланди.

Фото: Навоий вилояти ИИБ

Навоий вилояти ИИБ ахборот хизматининг Kun.uz’га маълум қилишича, 15 феврал куни олинган тезкор маълумотга кўра Навоий шаҳрида тезкор тадбир ўтказилган. Тадбир давомида фуқаро Т.Ҳ. бошқарувидаги Isuzu юк машинаси шубҳа остига олиниб, кузатилган.

Юк машинаси 10 тонна ун маҳсулотини “Навоий дон маҳсулотлари” АЖдан “Зарафшон озиқ-овқат инвест” ХК номига олиб чиққан. Ҳайдовчи мазкур ун маҳсулотларини Зарафшон шаҳридаги Қурувчи маҳалласига олиб бориши лозим бўлса ҳам Навоий шаҳри Лочин маҳалласидаги новвойхона омборига тушираётган вақтида ушланган.

ИИБ ходимлари томонидан ун маҳсулоти белгиланган манзилга етиб бориши ҳамда аҳолига тарқатилиши таъминланган. Ҳозирда ҳолат юзасидан терговга қадар суриштирув ҳаракатлари олиб борилмоқда.

Навоийда бировларнинг номига кредит олиб, ўзлаштириб юборган шахсларга жиноий иш қўзғатилди