Мадридда ёнилғи нархи ошишига қарши норозилик намойиши ўтказилди

Қайд этилишича, Испания энергия нархлари ўсиши билан боғлиқ инфляция оқибатларига тўқнаш келди.

Фото: SOPA Images/Sipa USA

Мадридда ёнилғи нархлари ошишига қарши ўтказилган намойишларда 150 минг киши иштирок этди.

Евроньюс хабарига кўра, намойишчилар ҳукуматдан қишлоқ хўжалиги соҳасидаги муаммоларга зудлик билан ечим топишни сўраган.

Мамлакат энергия нархлари ўсиши билан боғлиқ инфляция оқибатларига тўқнаш келди. Қайд этилишича, ҳозирда Испанияда инфляция 7,6 фоизни ташкил этмоқда.

Ёнилғи нархлари ўсишидан норози бўлган юк машиналари ҳайдовчиларининг иш ташлашлари натижасида юк ташиш занжири узилган ва супермаркетларда айрим маҳсулотлар танқислиги пайдо бўлган.

Хабар қилинишича, юк машиналари ҳайдовчилари ва фермерларнинг норозилик намойишлари бутун Европа бўйича бўлиб ўтган.