Туркия Швеция ва Финландия билан музокара ўтказишни рад этди - ОАВ 

Туркия ҳукумати НАТОнинг Швеция ва Финландия билан уч томонлама музокара ўтказиш тўғрисидаги таклифини рад этди. Бу ҳақда Financial Times газетаси ўз манбаларига таяниб хабар берди. 

Манбаларнинг сўзларига кўра, уч мамлакат вакиллари ва НАТО томонидан нейтрал воситачи иштирокидаги учрашув чоршанба куни ўтказилиши режалаштирилганди. Аммо Туркия Ҳелсинки ва Стокҳолмдан аниқ таклиф олмагунича ҳеч қандай музокарада иштирок этмаслигини маълум қилган.

НАТО вакилининг газетага билдиришича, уч томонлама учрашув алянснинг "якуний мақсади" бўлган.

Финландия ва Швеция Россиянинг Украинага кенг кўламли бостириб кириши фонида НАТОга қўшилиш ниятини эълон қилди. Бу давлатларни алянсга қабул қилиш учун унинг барча 30 аъзосининг розилиги керак. Айни пайтда Анқара бунга қарши чиқмоқда. Туркия президенти Ражаб Тоййиб Эрдўған буни “Финландия ва Швецияда Туркияда террорчилик ташкилотлари вакиллари деб аталувчи курдлар бўйича аниқ позиция йўқлиги” билан изоҳлади. 

Бундан ташқари, Туркия 2019 йилда Сурияда курдларга қарши ҳарбий операция бошлаганидан сўнг Стокҳолм ва Ҳелсинки Туркия томонига мудофаа маҳсулотларини етказиб беришга санкциялар жорий этган. 

25 май куни Туркия Швеция ва Финландия вакиллари билан бўлиб ўтган йиғилишда бу давлатларга 10 та шартни илгари сурди. Улардан асосийси - Курдистон Ишчи партияси фаолиятининг тақиқланиши.