АЭХА Киев талабига биноан Украинадаги иккита ядровий иншоотни текширади

Россия Киевнинг гўёки «ифлос бомба билан провокация уюштириш» режалари ҳақида баёнот берганидан сўнг Атом энергияси халқаро агентлиги (АЭХА) Украинадаги иккита ядровий иншоотда мустақил текширув ўтказади. Бу ҳақда 27 октябр, пайшанба куни агентлик сайтида маълум қилинди.

Текшириш талаби Украина томонидан берилган, дея қайд этади АЭХА. Агентлик веб-сайтида қайд этилишича, Россия АЭХА кафолатлари остидаги ва инспекторлар мунтазам равишда ташриф буюрган икки жойда «ифлос бомбалар» ишлаб чиқарилиши мумкинлиги билан боғлиқ фаолиятлар ҳақида бир неча даъво қилган.

АЭХА раҳбари Рафаэл Гроссининг айтишича, инспекторлар ҳар қандай «ядровий материалнинг қайта йўналтирилиши»ни аниқлаш учун «ушбу объектларда мустақил текширувлар ўтказади». АЭХА, шунингдек, агентлик бир ой олдин икки объектдан бирини ўргангани ва «ҳеч қандай декларация қилинмаган ядровий фаолият ёки материал» топилмаганини тасдиқлади.

«Бизнинг текширувимиз якунлангандан сўнг, натижаларни баҳолаймиз ва ўз хулосаларимизни стандарт амалиётимизга мувофиқ эълон қиламиз. Бироқ, ушбу масаланинг қизиқиши ва долзарблигини билган ҳолда, агентлик хулосаларни АЭХА Бошқарувчилар кенгашига тақдим этади ва шундан сўнг дарҳол жамоатчиликка берилади», деди Гросси.

Аввалроқ Россия президенти Владимир Путин Валдай форумида сўзлаган нутқида Россия АЭХАнинг Украина ядровий иншоотларини текшириш ташаббусини қўллаб-қувватлашини маълум қилганди. «Биз бунинг тарафдоримиз, буни имкон қадар тезроқ, имкон қадар кенгроқ қилиш керак», деди у.

Бундан бир неча кун олдин россиялик расмийлар Киев гўёки «ифлос бомба» билан провокация қилишни режалаштираётганини қайта-қайта таъкидлаганди. Бу ҳақда Россия мудофаа вазири Сергей Шойгу АҚШ, Франция, Туркия, Буюк Британия, Ҳиндистон ва Хитой мудофаа вазирларини огоҳлантирди.

Киев бу каби даъволарни доимий равишда рад этиб, Россия бундай бомбадан ўзи фойдаланишига йўл очиши мумкинлигини таъкидлайди. «Агар Россия қўнғироқ қилиб, Украина гўёки бирор нарса тайёрлаяпти, деса, бу бир нарсани англатади: Россия буларнинг барчасини аллақачон тайёрлаб қўйган. Шунинг учун бугун Россия Мудофаа вазири телефон ўйинини ташкил қилиб, вазирларга қўнғироқ қилиб, «ифлос бомба» деб аталган тўқима нарса ҳақида гапиряпти. Ядро бомбаси, бу урушда тасаввур қилиш мумкин бўлган барча ифлос нарсаларнинг манбайи ким эканлигини ҳамма жуда яхши тушунади», деди Украина президенти Володимир Зеленский.

«Россия вазиятни янада кучайтириш учун уйдирма баҳоналардан фойдаланмаслиги керак. Украина ўз ҳудудида радиоактив моддалар бўлган «ифлос бомба»ни қўллашни режалаштираётгани ҳақидаги иддаолар соф ёлғондир», - деди НАТО бош котиби Йенс Столтенберг.

«Ифлос бомба» - бу радиоактив моддалар билан тўлдирилган, портлашда ядровий реакцияга олиб келмайдиган, лекин ҳудуднинг радиоактив ифлосланишига сабаб бўладиган ноядровий ракета.