“Қарор жиддий ва кескин бўлади”. Танқидий мақоладан кейин участкавойга чора кўриладиган бўлди

Самарқанд вилояти Ички ишлар бошқармаси бугун, 14 ноябр куни Kun.uz'да эълон қилинган “Любой” ишни биттада битирадиган” профилактика инспектори жазосиз қолди” сарлавҳали хабар юзасидан тезкор муносабат билдирди.

ИИББ матбуот хизмати раҳбари Жаҳонгир Саъдуллаевнинг баёнотида Kun.uz'нинг мақоласидаги “танқид ва эътирозлар ўринли” экани таъкидланган.

“Албатта, ушбу ҳолат жамоатчилик орасида “Самарқанд ИИБда шундай ходимларга жой бор экан-да, қонунларни бузган ходимлар жазосиз қолаверар экан-да”, деган фикрни келтириб чиқаради. Асло! Нашрнинг ушбу мақоласини ҳам шахсан бошқарма бошлиғи билан ўтириб муҳокама қилдик. Бошқарма бошлиғи Раҳмат Тошназарович доим бир гапни таъкидлайдилар: “Бизнинг мақсадимиз халқни рози қилиш, унга хизмат қилиш, унинг дарду-ташвишлари билан яшаш. Қайси ходим буни чуқур англаб, хизматини шу мезонда олиб бормас экан орамизда уларга жой йўқ”.

Биз тизим шаънига путур етказувчи, ўз манфаатларини фуқаролар манфаатидан устун қўядиган, қўпол, касб маданиятини билмайдиган ходимлардан шу заҳоти воз кечамиз. Кечяпмиз ҳам, кўрсатяпмиз ҳам.

Юқоридаги ҳолат ҳам тегишли хизматларимиз томонидан атрофлича ўрганиб чиқилди. Яқинда бошқарма бошлиғи ушбу профилактика инспекторини катта йиғилишда отаси иштирокида ҳам қаттиқ огоҳлантирганди. Хулоса бўлмаяпти. Тез кунларда ушбу профилактика инспектори бўйича шундай қарор қабул қилинадики, қарор жиддий ва кескин бўлади. Буни кенг жамоатчиликка эълон қиламиз”, – дейилади расмий муносабатда.

Қўшимча қилинишича, вилоят ИИББ бошлиғи Раҳмат Маматов бугун, 14 ноябрда Пастдарғом тумани ИИБ шахсий таркиби билан танқидий йиғилиш ўтказган, унда инспектор Салоҳиддин Пардақулов масаласида ҳам сўз борган.

Эслатиб ўтамиз, Пардақулов 2022 йилнинг 20 январ куни ўзи ишлаётган маҳалладаги фуқаронинг “Equinox” автомобилини ҳужжатсиз бошқарган. У автомобилда йўл ҳаракати қоидаларини бир неча марта қўпол тарзда бузган ва бошқа машинага бориб урилган. Айнан ЙТҲ содир этилишидан аввалги ҳолатлар ҳам видеорегистраторга ёзиб олинган. Бироқ судда бошқа фуқаро айбдор деб топилган ва “Equinox”га етказилган 62,5 миллион сўм зарарни у тўлаши белгиланган.

Раҳмат Маматов асл вазият қандай бўлганини билганидан сўнг, профилактика инспекторини мард ва виждонли бўлишга чақирганди.