Андижонда ҳам қишки таътил муддати узайтирилди

Андижон вилоятидаги таълим муассасаларига таътил узайтирилиб, дарслар 23 январдан бошланиши маълум қилинди.

“Маҳаллий ҳокимликлар билан келишилган ҳолда вилоят ҳудудида совуқ об-ҳаво шароити сақланиб қолаётгани туфайли Андижон вилоятидаги таълим муассасаларида қишки таътил 2023 йил 23 январга қадар узайтирилди.

Ўқув машғулотлари 23 январь, душанба кунидан бошланади”,– дейилади вилоят халқ таълими бошқармаси(ҳозирги Мактабгача ва мактаб таълими вазирлигининг ҳудудий бошқармаси)нинг хабарида.

Маълумот учун, аввалроқ Бухоро вилояти ҳокимлиги ҳудуддаги барча таълим муассасалари учун дарслар 23 январдан бошланишини эълон қилганди.