Байденнинг рейтинги махфий ҳужжатлар билан боғлиқ можаро фонида пасая бошлади 

АҚШ президенти Жо Байденнинг рейтинги ўтган йил охиридаги юқорилаш тенденциясидан сўнг яна пасайишни бошлади. Бунинг сабаби Оқ уй раҳбари томонидан махфий ҳужжатларни номақбул тарзда сақлаш билан боғлиқ жанжалдир. Ўз навбатида, феврал ойи бошида Байден иккинчи муддатга сайланиш режаларини расман эълон қилиши кутилмоқда. 

Жо Байденнинг рейтинглари ноябр ойидаги ижобий ўсиш тенденциясидан сўнг яна пастга тушди ва бутун президентлик давридаги минимал қийматларга яқинлашди. 

Бу Reuters/Ipsos агентлиги томонидан ўтказилган ижтимоий сўров натижаларига кўра маълум бўлди. Тадқиқотга кўра, бугунги кунда америкаликларнинг атиги 40 фоизи президентнинг фаолиятини маъқуллайди, бу икки ҳафта олдингига нисбатан 4 балл паст ва ўтган йилнинг май ва июн ойларида қайд этилган энг паст кўрсаткичлардан атиги 4 баллга кўп. 

Америка раҳбарининг машҳурлиги Вашингтондаги таҳлил маркази ва Делавэр штатидаги иккита уйида махфий ҳужжатлар топилганидан сўнг пасайиб кетди. 

Журналистлар билан суҳбат чоғида Жо Байден ҳужжатлар хавфсизлигига ишончи комил эканини айтишдан бошқа яхшироқ нарсани ўйлаб топа олмади. 

«Менинг Сorvette автомобилим қулфланган гаражда турибди. У кўчада турганга ўхшамайди», деди президент ўзини оқлашга уриниб. Махфий ҳужжатлар айнан автомобил ичидан топилган эди. 

Жо Байден махфий ҳужжатлар иши бўйича тайинланган махсус прокурор томонидан олиб борилаётган тергов ўзининг фойдасига якунланишига ишончи комил.

Президент билан содир бўлаётган воқеалар Конгресс қуйи палатасидаги республикачилар эътиборидан четда қолмади: улар Жо Байденга қарши терговлар кўламини кенгайтиришни режалаштирмоқда. 

Reuters манбаларига кўра, 80 ёшли Жо Байден, ўз атрофида содир бўлаётган воқеаларга қарамай, иккинчи муддатга номзодини қўяди. Балки, бу келаси ойда, давлат раҳбарининг 7 февралга белгиланган Конгрессга мурожаатидан сўнг эълон қилинади. 

Жамоатчилик билан алоқалар бўйича мутахассис, сиёсатшунос Жон Вароли фикрига кўра, агар жанжал Америка президентини иккинчи муддатга сайланиш амбицияларидан воз кечишга мажбур қилса, вице-президент Камала Харрис номзоди қўйилиши мумкин. Шунингдек, сиёсий доираларда Ҳиллари Клинтоннинг қайтиши ҳам муҳокама қилинмоқда.