Бахмутдаги жанглар ва ертўлада яшаётган донбассликлар. Уруш суратлари

Украинада урушнинг 350-куни ўтди. Асосий маълумотлар:

• Володимир Зеленский Буюк Британияга ташриф буюрди. Бу ерда у бош вазир Риши Сунак ҳамда қирол Чарлз III билан учрашди, шунингдек Британия парламентида нутқ сўзлади. Риши Сунак Киевга ҳарбий ёрдам етказиб беришни тезлаштиришга ваъда қилди. Жумладан, Challenger 2 танклари Украинага март ойидаёқ етиб бориши маълум қилинди.
• Буюк Британияга ташрифидан кейин Украина президенти Парижга келиб, бу ерда французлар президенти Эммануэл Макрон ҳамда Берлиндан учиб келган Германия канцлери Олаф  Шолц билан учрашди.
• Буюк Британия Россияга қарши янги санкциялар эълон қилди. Рўйхатга Путиннинг кичик қизи экани айтиладиган Светлана Кривоногихнинг онаси ҳамда Россия президентининг «рақамли кооперативи» ҳам ўрин олган.
• Украина уруш бошлангач Россияга мажбуран олиб кетилган саккиз мингдан ошиқ боладан 128 нафарини қайтарди.
• Россия колонияларида «Вагнер» хусусий ҳарбий компания сафига ёлланиб, Украинадаги урушга боришдан бош тортган маҳбусларга янги жиноий ишлар очиш билан таҳдид қилинмоқда. Шунингдек тергов изоляторларида ҳибсга олинганларни ҳам урушга юборишга ҳаракат қилишмоқда — бунинг эвазига уларга жиноий ишларни ёпиш ваъда қилинмоқда. Шу билан бирга Евгений Пригожин хусусий ҳарбий компания маҳбусларни урушга жалб этишни тўхтатгани ҳақида маълум қилди.
• Россия армияси тўғрисида «фейк» тарқатишда айбланиб, тергов изоляторида сақланаётган Владимир Кара-Мурзанинг ҳибсдаги муддати 12 мартга қадар узайтирилди.

Бахмут жанглар вақтида

Украиналик ҳарбийлар 2022 йил июлидан буён Бахмутни мудофаа қилишмоқда. Володимир Зеленский французларнинг Le Figaro нашрига берган интервюсида, Украина қуролли кучлари Ғарбдаги иттифоқчилардан қуроллар келмагунча «дош бериб туриши кераклиги»ни айтди. Украина президенти Бахмут катта стратегик аҳамиятга эга эмаслиги, 2023 йил февралига келиб Россия қўшини шаҳарни тўлиқ вайрон этганини қўшимча қилди. «Аммо агар улар Бахмутни олишса, яна олдинга юришни исташади. Бу уларга устунлик беради. Масала шундаки, Бахмутдан кейин нима бўлади», — дея қайд этган Зеленский.

Авдийивкадаги ҳаёт

Авдийивка шаҳри Донецк областининг марказий қисмида жойлашган бўлиб, истило остидаги Донецк билан қўшни шаҳар ҳисобланади. Бу шаҳар Украина армияси назоратида қолган. Украина қуролли кучлари Бош штабидан маълум қилишларича, Россия қўшини шаҳарни мунтазам равишда ўққа тутмоқда ва Авдийивка йўналишида ҳужумга ўтишга тайёрланмоқда. Област ҳарбий маъмурияти раҳбари Павел Кириленконинг сўзларига кўра, шаҳар «амалда ер билан яксон қилинган», аммо «тўққизинчи ойдирки Украина қўшинларининг Донецк областидаги қалъаси» бўлиб қолмоқда.

Киевда Чкаловнинг ҳайкали бузиб ташланиши 

Мариуполдаги россиялик сапёрлар