Германияда украиналик болага суиқасд қилингани ҳақидаги версия тасдиқланмади

Тергов номаълум шахс Айнбекдаги кўприкдан 10 ёшли болани каналга улоқтириб юборган деб ҳисоблаганди. Янги маълумотлар шуни кўрсатадики, бола нотаниш одам билан тўқнашувдан олдин каналда ўйнаб жароҳат олган.

Фото: Ralph Peters/imago images

Айнбек шаҳрида (Қуйи Саксония) украиналик 10 ёшли болани қасддан ўлдиришга уриниш бўйича жиноий ишни тубдан ўзгартирувчи янги маълумотлар пайдо бўлди. Гёттинген прокуратураси 7 сентябр, пайшанба куни маълум қилишича, терговчилар русийзабон эркак болага ҳужум қилиб, уни кўприкдан каналга улоқтиргани ҳақидаги версияни тасдиқлай олмади.

Боланинг ўзи жароҳат олган ва сувга тушмаган

Тергов маълумотларига кўра, ўсмир каналнинг ўзида ўйнаб юрган вақтида шиша бўлаги ёки бошқа ўткир буюм билан жароҳатланган ва кейинроқ рус тилида сўзлашувчи эркак билан жанжал келиб чиққан. Болалар ҳазиллашиб сўкинган, бироз вақт ўтгач, номаълум шахс уларга яқинлашиб, рус тилида гапирган, улар буни тушунган, дейилади хабарда. Улар эркакнинг ғазабини қўзғатган, улар ўртасида жанжал келиб чиққан.

10 ёшли бола каналдан темир таянчларга чиқа бошлаганида, эркак гўёки болани футболкасидан ушлаб олган. Полициянинг тахминига кўра, шу сабабли у мувозанатни йўқотиб, чуқурлиги тахминан 20 сантиметр бўлган сувга тушган. Бироқ ўзини сувга итариб юборишгандек таассуротга эга бўлган бола, қайта кўриб чиқилган маълумотларга кўра, каналга тушиб кетмаган.

Эркак ҳақиқатан ҳам шишани каналда ётган ўсмир томон ташлаган, дея қўшимча қилди прокуратура. Бироқ, терговчилар бола нишонга олинганми ёки шиша тасодифан тегиб кетганми, буни аниқлай олишмади.

Ота-онасининг кир бўлган кийимга реакциясидан қўрқиш

Қотилликка суиқасднинг асосий версияси гувоҳларнинг сўзларига, кўприкнинг пўлат устунларидаги қон доғлари ва шифохона маълумотига асосланган эди. Кейинчалик маълум бўлишича, боланинг биринчи кўрсатмаси ёлғон бўлиб чиққан, чунки у ўйин вақтида кир бўлган кийим ва оёғи жароҳатланганига ота-онасининг муносабатидан қўрққан, дея таъкидлайди dpa агентлиги.

Дастлаб Гёттинген прокуратураси номаълум шахс бир гуруҳ украиналик болаларга яқинлашиб, улар рус тилида гапириши кераклигини айтганини маълум қилган. Шунда эркак уларга ҳужум қилиб, 10 ёшли болани кўприк панжарасидан ошиб, каналга улоқтирган, сўнг каналда ётган болага шиша бутилкани улоқтириб, воқеа жойидан қочиб кетган.

Янги маълумотлардан келиб чиқиб, иш ёпилади, деб хабар берди прокуратура. Идора болалар билан жанжал қилган эркакнинг шахсини аниқлаш имконияти бўйича жавоб тақдим этмади.