Сенат 2024 йил учун давлат бюджети тўғрисидаги қонунни маъқуллади

Олий Мажлис Сенатининг 48-ялпи мажлисида «2024 йил учун Ўзбекистон Республикасининг Давлат бюджети тўғрисида»ги қонуни кўриб чиқилди.

Муҳокамалар жараёнида 2024 йилда Ўзбекистон иқтисодиётида ялпи ички маҳсулотнинг ўсиш суръатлари 5,6-5,8 фоиз миқдорида бўлиши кутилаётгани қайд этилди.

Қонунда 2024 йилда консолидациялашган бюджет даромадлари 375 трлн сўм миқдорида, харажатлари эса 427,6 трлн сўм миқдорида режалаштирилган ҳолда консолидациялашган бюджет 52,6 трлн сўм ёки ялпи ички маҳсулотга нисбатан 4 фоиз миқдоридаги тақчиллик билан шакллантирилди. Шунингдек, асосий солиқ ставкалари ўзгаришсиз қолдирилди.

Кейинги йилда ҳам бюджет харажатларининг ижтимоий йўналтирилгани сақлаб қолиниб, таълим, соғлиқни сақлаш, ижтимоий ҳимоя, фан, маданият ва спортни ривожлантириш, муҳтож аҳолини уй-жой билан таъминлаш ва бошқа ижтимоий тадбирлар учун жами Давлат бюджети харажатларининг қарийб 50 фоизи ёки 151,5 трлн сўм йўналтирилади.

Қайд этилишича, маҳаллий ва импортга белгиланган акциз солиғи ставкаларини тенглаштириш мақсадида алкогол ва тамаки маҳсулотлари импорти учун ставка 5 фоизга пасайтирилиб, ер қаъридан фойдаланганлик учун солиқ ставкаси цемент ишлаб чиқаришга мўлжалланган оҳактошнинг 1 тоннаси учун 2 бараварга пасайтирилмоқда.

Қонун сенаторлар томонидан маъқулланди.