«Тоттенҳэм» ҳисобни очиши мумкин эди, аммо ўз имкониятидан фойдалана олмади, кейин эса ҳимоячиларининг хатолари туфайли икки дақиқа ичида икки гол ўтказиб юборди. Дастлаб Гордон Удожидан тўпни олиб қўйди ва Исакни қулай вазиятга чиқарди, кейин Порронинг хато пасидан кейин тўпни эгаллаб олиб, ўз номини таблога ёздириб қўйди — у жорий мавсумда «Сент-Жеймс Парк»да «катта олтилик»нинг барча вакилларига гол урди. Исак биринчи голи билан «Нюкасл» афсоналари — Алан Ширер, Энди Коул ва Лес Фердинанд билан тенглашиб олди. Бунгача «қарғалар»нинг фақат шу уч футболчи АПЛнинг қаторасига олти уй учрашувида рақиб дарвозаларини ишғол қилишга муваффақ бўлганди.
Мезбонлар танаффусдан кейин дарҳол ўйин тақдирини ҳал қилишди. «Шпорлар» ҳимоя чизиғини жуда олдинга чиқаришганди ва Сон рақиб жарима майдони яқинида тўпни олдиргач, Бруну Гимараэс узун пас орқали Исакни дарвозабон билан яккама-якка ҳолатга чиқариб юборди, ўйин охирида эса Гордоннинг бурчакдан узатган пасидан кейин Шер тўртинчи голни урди. Эдди Ҳау шогирдлари ўйиннинг атиги 27 фоиз қисмида (!) тўпга эгалик қилиб ҳам йирик ҳисобда ғалаба қозонди ва ҳозирча вақтинча олтинчи ўринга кўтарилиб, еврокубоклар йўлланмаси учун курашни давом эттирмоқда. «Тоттенҳэм» эса якшанба куни принципиал рақибига мухлислик қилишига тўғри келади, чунки фақат «Арсенал» ғалабасигина «Астон Вилла» топ-4 учун курашда олдинга чиқиб кетмаслигини таъминлайди.
Соғайиб сафга қайтган Де Бруйне билан ўйнаган «Манчестер Сити» биринчи бўлимни «Реал»га қарши ўйин учун куч тежаётгандек ўтказди. Бўлим бошидаёқ Ҳоланд уюштирган ҳужумдан кейин ҳисоб очилди ва «шляпкачилар» ҳимоячиси Ҳашиоки сўнгги уч турда иккинчи бор ўз жамоаси дарвозасини ишғол этиб қўйди. Иккинчи бўлимда Ковачич ажойиб зарбаси билан «шаҳарликлар»нинг тўлиқ устунлигини ҳисобда акс эттирди.
Доку эса ўйиннинг сўнгги қисми қаҳрамонига айланди. Ушбу белгиялик аввалига пеналти ишлади ва Ҳоланд ҳисобни йириклаштирди. Кейин у икки ҳимоячини финтлари билан доғда қолдириб уларнинг орасидан ёриб ўтди, учинчи ҳимоячининг оёқлари орасидан тўпни дарвоза тўрига йўллади. Кейин эса айнан унинг пасидан кейин Гвардиол ўйинга нуқта қўйди. Хорватиялик ҳимоячи Чемпионлар лигасидаги голидан кейин яна олис масофадан дарвоза тўрини ишғол этди. Унинг зарбаси шундай кучли эдики, дарвозабон жойидан қимирлашга улгурмади. Хосеп Гвардиола жамоаси биринчи ўринга кўтарилди ва «Ливерпул»ҳамда «Арсенал»нинг якшанба кунги ўйинлари натижасини кутади.
«МЮ» учун бу мавсумдаги рақибларнинг ҳеч бири оддий бўлмаяпти. «Борнмут» ҳам истисно бўлмади. Мезбонлар дастлаб майдон марказида тўпни олиб қўйиб, тезкор қарши ҳужум билан рақиб ҳимоячини доғда қолдирди. «Қизил иблислар» жавоб голини катта машаққат билан уришди, аммо мезбонлар яна осонлик билан ҳисобда олдинга чиқиб олишди. Клюйверт ҳеч қандай қаршиликсиз жарима майдонига кириб борди ва тўпни Камбваланинг ортидан туриб яқин бурчакка аниқ йўналтирди. Ушбу ёш ҳимоячи биринчи гол ўтказилган ҳужумда ҳам Соланкега осонлик билан алданганди.
Биринчи бўлим охирида Онана Клюйвернинг яқин масофадан газонга сапчитиб йўллаган зарбасини қайтарган ҳолда қаҳрамонлик кўрсатишига тўғри келди. У «Юнайтед» учун ўйинни қутқариш имконини қолдирди ва жамоа иккинчи бўлимда Фернандеш томонидан аниқ ижро этилган пеналти эвазига дурангга эришди. Бу натижа фақат тўпланган очколар сони бўйича «Нюкасл»га тенглашиш имконини берди. Аммо вазият бундан ҳам ёмонроқ тус олиши мумкин эди, қўшимча дақиқаларда «МЮ» VAR туфайли ўз дарвозасига 11 метрлик жарима зарбаси қўйилишидан қутулиб қолди, видеотакрор қўполлик жарима майдони ташқарида содир этилганини қайд этди.
Бу ҳолатда ҳам Камбвала ишончсиз ҳаракат қилиб, рақибни тўхтатиб қолганди.
«Атлетико» «Атлетик» хавф солиб турган кучли тўртликдаги ўрнини сақлаб қолиб, Чемпионлар лигасига йўлланма олиши талаб этилади. Аммо шу билан бирга, ҳафта ўртасида Дортмундга бўладиган муҳим сафарни ҳам ёддан чиқармаслик керак эди ва мадридликлар майдонга шу хаёл билан чиқиб келишди. «Жирона»нинг тезкор голи уларни реалликка қайтарди, Ян Коуто Довбикни бўш дарвозасига чиқариб юборганди.
Диего Симеоне жамоаси фақат бўлим ўрталарида ўзига кела бошлади ва Гутеррес жарима майдони ичида тўпни қўл билан ўйнагани туфайли белгиланган пеналтини Гризманн аниқ ижро этди. Бўлим охирида Саул мажбуран алмаштирилиши «матрасчилар» фойдасига ишлади. Унинг ўрнига тушган Мората арбитр томонидан биринчи бўлимга қўшиб берилган олтинчи дақиқада деярли умидсиз вазиятда тўпни сақлаб қолди ва Корреани голли пас билан таъминлади.
Бу мавсумда ўзи ҳисобни очган ўйинларида ютқазмаган «Жирона» иккинчи бўлим бошида ўтказиб юборилган голдан кейин таслим бўлди, бу вазиятда Гризманн ҳимоячилар хатосидан фойдаланиб, дублни расмийлаштирди. Француз ҳужумчиси энди Беллингҳемни ортда қолдирган ҳолда, 21 гол билан Испанияда барча турнирлар доирасида энг кўп гол урган футболчига айланди. Унинг жамоаси эса нафақат учинчи ўриндаги «Жирона» билан орадаги фарқни қисқартирди, балки энг яқин таъқибчисини беш баллга ортда қолдирмоқда.
Ўтган ҳафтада кубок финалида ютқазган «Малйорка» меҳмони бўлган Карло Анчелотти таркибда ротация амалга оширди. «Манчестер Сити»га қарши майдонга тушганлардан Родриго, Кроос, Карвахал ва Винисиус Жуниор захирада қолдирилди. Тшуаменига ҳам дам берилиши мумкин эди, аммо ЕЧЛда дисквалификацияга учраганди ва француз футболчисининг кучини тежашга зарурат йўқ эди. Аммо, ўйиннинг қийин кечишини таркибда юлдузлар йўқлигининг ўзи билан изоҳлаш ўринсиз. Қаймоқранглилар одатда доим «Малйорка» майдонида қийналади ва «Қироллик клуби» бу ерда сўнгги уч ўйиндан иккитасида ютқазган.
Танаффусга қадар меҳмонларда энг яхши вазият Беллингҳемнинг узоқдан йўллаган зарбаси бўлди, бу вазиятда тўп тўсинга тегди. Голни эса иккинчи бўлим бошида Тшуамени урди. Француз футболчиси жарима майдони ташқарисида ўзига тўп келиб тушиши билан ўйланиб ўтирмасдан кучли зарба йўллади ва дарвозабон рикошет туфайли ҳеч нарса қила олмади.
Шу билан бирга, мадридликлар қулай вазиятларни йўққа чиқаришди. Браим Диас тўпни дарвозабоннинг ўзига тепди, Валверде дарвозабонни алдаб ўтганидан кейин тўпни дарвоза чизиғига етиб келган ҳимоячи Настасични мўлжаллаб зарба беришни уддалади. Агар Лунин Дардернинг кучли ва аниқ зарбасини қайтара олмаганида ўйин бутунлай бошқача натижа билан тугаши ҳам мумкин эди. Аммо дарвозабон ўзини кўрсатди ва Мадридни чемпионликка яқинлаштирди. Бланкос сафар ўйинларидаги мағлубиятсиз сериясини 12 турга етказди. Бу «Реал»нинг Анчелотти бошқаруви давридаги энг яхши кўрсаткичи.
«Барселона»да Левандовски сафдан чиқди, аммо Жоау Феликс унинг йўқлигини билдирмади. Португалиялик футболчи керакли вақтда чалқанча услубидаги зарбаси билан жамоага ғалаба келтирди. Каталонияликлар биринчи бўлим охирида иккинчи голни уришга яқин келганди, аммо мезбонлар ҳимоячиси Чуст Фермин Лопеснинг зарбасидан кейин тўпни дарвоза чизиғи устидан қайтарди. Бу ҳаракат ва танаффус «Кадис»га ўзига келиб олишга имкон берди ва иккинчи бўлимда ўйин қарама-қарши курсларда кечди.
Мезбонлар рақиб дарвозасини ҳам ишғол этишди, аммо Хуанми офсайдга тушиб қолгани маълум бўлди. Аммо ўйин характери ўзгариб борди ва дисквалификация ўтаётган Хави ўз штабига керакли кўрсатмаларни берганидан кейин кўк-анорранглилар учталик алмаштиришни амалга оширишди. Интрига ўйин охирига қадар сақланиб қолган бўлса-да, меҳмонларнинг бу ўзгартиришлари амалда иш берди. Мезбонлар қолган вақт давомида дарвоза томон берилган зарбалардан кўра рақиб оёғига кўпроқ зарба беришига тўғри келди. Эндиликда класикодан олдин (жамоалар ҳафта ўртасида Чемпионлар лигаси чоракфиналида жавоб учрашувларида ҳам майдонга тушишади), «Реал» ва «Барса»ни саккиз очко ажратиб турибди.
Турин дербиси меҳмонларнинг тезкор голи билан бошланиши мумкин эди, аммо «Торино»ни ўтган мавсумда ранжита олган Влаҳович Киезанинг идеал пасидан кейин бир неча метрдан йўллаган зарбаси билан устунни нишонга олди. Ўйиннинг ярим соати ортда қолаётганида меҳмонлар жамоаси тўпурари яна қулай позицияда пайдо бўлди, аммо бу сафар уни Сербия миллий жамоасидаги шериги Милинкович-Савич тўхтатди. Биринчи бўлимга қўшиб берилган дақиқаларда Лазаро рақибни кўкка совурилган вазиятлар учун жазолаши мумкин эди, аммо унинг зарбасидан кейин тўп дарвоза тўсини юқорисидан ўтиб кетди.
Умуман олганда, бу ўйинда яққол голли вазиятлар кўп бўлмади, ўйин асосан асаблар жангига айланди, кураш кўп эди, аммо ижодкорлик етишмади. Якунда ўйин мантиғига мос бўлган 0:0 ҳисоби икки жамоага ҳам ўз сериясини давом эттиришга имкон берди. «Ювентус» дербида 18 ўйиндирки ютқазмаяпти (+13=5), бу жамоалар қарама-қаршилигида бундай серия охирги бор 1929 йилдан 1939 йилга қадар бўлган даврда кузатилган. «Торино» эса ўз тарихида биринчи бор бир мавсумда қаторасига 11 та уй учрашувида дарвозаси дахлсизлигини сақлаб қолди.
Дисквалификацияга учраган Томас Тухелсиз майдонга тушган «Бавария» «Байер»га ўйнамасдан чемпион бўлишга йўл қўймади. Шу билан бирга, буни мюнхенликларнинг осон ғалабаси деб ҳам бўлмайди, мезбонлар «Кёлн»ни таслим этиши учун бир бир соатдан кўпроқ вақт талаб этилди. Қолаверса, ҳал қилувчи гол — бурчак зарбаси ностандарт тарзда ижро этилиши орқали урилди. Киммиҳ тўпни ҳаводан ошириб бериш ўрнига Рафаэл Геррейруга етказиб берди ва португалиялик ҳимоячи уни чиройли зарба билан олис бурчакка йўналтирди. Ўйин якунига оз вақт қолганида эса Мюллер меҳмонлар ҳимоясидаги тартибсизликдан фойдаланиб қолди. Энди Леверкузен чемпион бўлиш учун бугун ўз ўйинида «Вердер» устидан ғалаба қозониши талаб этилади.
Тўртинчи ўрин ва Чемпионлар йўлланмаси учун кечаётган қизғин курашда бу турда ҳам «Лейпциг» дастлабки қадамни ташлади. Дастлаб Дани Олмо жарима майдони яқинида тўпни қабул қилиб олиб, ҳимоячининг фаол қаршилигига қарамасдан тўпни пастки бурчакка йўллади. Дортмунд эса «Боруссия» жамоаларининг параллел кечган дербисида Забитцернинг дубли билан жавоб қайтарди. Австриялик яримҳимоячининг биринчи голи жуда чиройли чиқди. У ўткир бурчакда туриб Шлоттербекнинг олисдан узатиб берган тўпни тўхтатмасдан дарвоза тўрига жойлади. Унинг пеналтидан урган иккинчи голига гладбаҳликлар Вебернинг голи билан жавоб қайтарди, шу туфайли икки ўйинда ҳам жамоалар танаффусга минимал устунлик билан йўл олишди.
Иккинчи бўлимда эса кичик «Боруссия» дарвозасига иккинчи пеналти қўйилди. Бу вазиятда дарвозабон тўпга ўйнаган ва шундан кейингина инерция бўйича Адейеми билан тўқнашганди, VAR фақат Забитцер «нуқта»дан тўпни дарвозага йўллаганидагина арбитрга бу ҳақда хабар берди. Бу вазиятда алоқа панд берган, аммо барибир хато тузатилиб, гол бекор қилинди, бу эса интрига сўнгги дақиқаларга қадар сақланиб қолишини таъминлади. Ўйинларнинг қолган қисмида «Лейпциг» «Волфсбург»ни йирик ҳисобда тор-мор этди, «асаларилар» эса озчилик бўлиб қолиб (55-дақиқада Адейеми четлатилди) қўшимча дақиқаларда ғалабани қўлдан бой беришига бир бахя қолди. Аммо икки рақобатчи ҳам якунда ўз ўрнида қолди — очколар тенг ҳолатда «ҳўкизлар» қўшимча кўрсаткичлар эвазига турнир жадвалида «асаларилар»дан юқорида жойлашган.
«Штутгарт» эса ўзини учинчи ўринда анча хотиржам ҳис қилмоқда. Шваблар шанба кунги ўйинда катта куч сарфламасдан, биринчи бўлимдаёқ уч гол урган ҳолда ғалаба қозонди. Одатдагидек жамоанинг асосий ҳужумчилари масалани ҳал қилишди. Ҳисобни очган Гирасси бир мавсумда 25 гол уриш орқали клуб рекордини ўрнатди. Ундав эса 1996 йилдан буён бундеслигадаги дебют мавсумидаёқ 16 гол урган илк германиялик футболчи бўлди.
Унинг ўтмишдоши ЖАРда туғилган ва Германия фуқаролигини қабул қилган Шон Данди бўлган. Ундавнинг фаолияти ҳам ностандарт кечган. У бир неча йилни қуйи лигаларда ўтказган, у ердан Белгиянинг «Юнион» клубига таклиф олган. У билан жамоа иккинчи дивизиондан чиқиб, ҳозирги даражасига етишган, Ундав ҳам футболчиларни ривожлантириш тизими бўйича кўтарилиб,«Брайтон» сафига ўтган, бу икки клуб эгаси бир киши ҳисобланади. Шундай қилиб, Дениз ўз ватанида юқори дивизионда 27 ёшида дебют қилишга эришади, унинг муваффақиятл дебюти миллий жамоадан чақирув олишига олиб келди ва у энди Евро-2024 турнирида иштирок этиши мумкин.
Кун статистикаси
ПСВ ҳужумчиси Люк де Йонг Нидерландия чемпионатида тўрт мавсумда камида 25 гол урган 4-футболчига айланди.
«Порту»да 19 йилдан буён илк бор бир мавсумда тўққиз четлатиш кузатилди.
«Фенербаҳче» бу мавсумда ўйинларнинг атиги 33 фоизида ғалаба қозонган — бу жамоа мураббийлари учун 1987/88 йиллар мавсумидан буён энг ёмон натижаси. Бундай натижа қайд этган Фернанду Сантуш ишдан бўшатилди.
«Манчестер Сити» «Лутон» билан ўйинда 37 бор зарба йўллади — бу АПЛда мавсум рекорди.
«Унион» ҳимоячиси Фогт бундеслигада 267 ўйин ўтказиб, бирорта гол урмади. Бу турнирда рекорд кўрсаткич ҳисобланади, бунгача бу борадаги энг юқори кўрсаткич ўтган асрнинг 60-70-йилларида ўйнаган Дитмар Швагерга тегишли эди.
