Полшадан Ўзбекистонга грант ва молиявий-техник кўмак жалб қилиниши мумкин

Ўзбекистон элчиси Алишер Аъзамхўжаев Полша ташқи ишлар вазирининг маслаҳатчиси Магдалена Полак-Золадкевич ва Ҳамкорликни ривожлантириш департаменти директори Магдалена Сидорович билан учрашув ўтказди.

Фото: "Дунё" АА

"Дунё" хабарига кўра, мулоқот давомида икки мамлакат ўртасидаги алоқаларни барча соҳаларда янада жадаллаштириш, Полшадан Ўзбекистонга грант ва молиявий-техник кўмак жалб қилиш имкониятлари муҳокама қилинди.

Полша вакиллари ўзбекистонлик талабалар учун ҳар йили Акадeмик алмашинув миллий агeнтлигининг (NAWA) грантлари ва стипендиялари тақдим этилишини маълум қилди.

Шунингдек, Полша ТИВ Ҳамкорликни ривожлантириш департаменти ва Лех Качинский номидаги Давлат бошқаруви миллий мактабининг (KSAP) "Шарқий ҳамкорлик давлат бошқаруви академияси" (AAPPW) дастури орқали Ўзбекистон давлат идоралари ходимлари учун икки ҳафталик махсус малака ошириш тренинглари ташкил этиш мумкинлиги қайд этилди.

Бундан ташқари, Полша Стратегик захиралар давлат агентлиги, Lane Kirkland стипендия дастури, EURLO дастури, Adamed компанияси ва бошқа жамғармалар орқали Ўзбекистонга Полшадан грант ва молиявий-техник кўмакни икки баробарга ошириш бўйича келишувга эришилди.