Испания рекорд арафасида, Англия тарихни янгилаши мумкин. Финал превюси

Испания дастлабки турдан финалгача ажойиб ўйини билан турнирнинг энг ёрқин жамоаси бўлиб турибди. Мураббий Луис де ла Фуэнта Родри ва Мората сингари тажрибали ҳамда Ламин Ямал ва Нико Уилямс сингари иқтидорлардан иборат ажойиб жамоа билан барча рақибларни бирин-кетин йўлидан олиб ташламоқда. «Қизил фурия» юришини давом эттириб, Евро тарихида 4 марта ғолибликни қўлга киритган илк жамоага айланмоқчи. Ҳозиргача испанлар 3 маротаба (1964, 2008, 2012 йиллар) кўҳна қитъада тенгсиз деб топилган. Навбатдаги чемпионлик Испанияни рекордчига айлантиради.

Испанлардан фарқли ўлароқ, Англия ўз тарихида ҳали бирор маротаба ҳам Европа чемпионлигини қўлга киритмаган. Инглизларнинг турнирдаги энг яхши натижаси 2021 йилда қайд этилган бўлиб, Саутгейт шогирдлари турнир финалчисига айланиб, ҳал қилувчи баҳсда Италияга пеналтилар сериясида (1:1, 2:3 – пеналти) мағлуб бўлган. Ҳарри Кейн сардорлигидаги англияликлар бугун тарихдан жой олиши мумкин.

Жамоалар финалга қандай етиб келди?

Испанлар инглизлардан кўра, финалгача номдор жамоаларга қарши саф тортишди. Де ла Фуэнта шогирдлари Хорватияни гуруҳдан қолдирган бўлса, амалдаги чемпион Италияни мағлуб этди. Плей-оффларда эса Гуржистон, мезбон Германия ва чемпионлик учун асосий фаворит саналган Францияни турнирдан чиқариб юборди.

Англия эса ўтган 6та ўйиннинг фақат 3тасида ўйин вақтида ғолиб бўлди, қолган 3та баҳсда дуранг қайд этди. Гарет Саутгейт шогирдлари плей-оффларда Словакия, Швейцария ва Нидерландияни мағлуб этиб, финалгача етиб келди.

Испаниянинг финалгача натижалари:

1-тур. Испания – Хорватия 3:0

2-тур. Испания – Италия 1:0

3-тур. Испания – Албания 1:0

1/8 финал. Испания – Гуржистон 4:1

1/4 финал. Испания – Германия 2:1

1/2 финал. Испания – Франция 2:1.

Англиянинг финалгача натижалари:

1-тур. Англия – Сербия 1:0

2-тур. Англия – Дания 1:1

3-тур. Англия – Словения 0:0

1/8 финал. Англия – Словакия 2:1

1/4 финал. Англия – Швейцария 1:1 (пен – 5:3)

1/2 финал. Англия – Нидерландия 2:1

Трансфер баҳолари: Англия Испаниядан қимматроқ

Transfermarkt порталига кўра, Англия миллий жамоаси таркибининг умумий трансфер баҳоси бўйича Испаниядан қиммат саналади. Англиянинг умумий трансфер баҳоси 1,52 миллиард еврони ташкил этса, Испания миллий жамоаси бу борада 965 миллион евро нархланган.

Испаниянинг энг қимматбаҳо 3 футболчиси:

1. Родри – 120 млн евро

2. Ламин Ямал – 90 млн евро

3. Нико Уилямс – 60 млн евро.

Англиянинг энг қимматбаҳо 3 футболчиси:

1. Жуд Беллингҳем – 180 млн евро

2. Фил Фоден – 150 млн евро

3. Букайо Сака – 140 млн евро.

Тахминий таркиблар

Испания: Симон; Карвахал, ле Норман, Ляпорт, Кукуреля; Руис, Родри, Олмо; Ямал, Мората, Уилямс

Англия: Пикфорд; Уокер, Стоунз, Гехи; Сака, Мейну, Райс, Шоу; Беллингҳем, Фоден; Кейн

Анонс. Евро-2024. Финал

14 июл (шанба)

Испания – Англия

Ўйин бошланиш вақти: 23:59

Cтадион: Берлин, «Олимпиаштадиум».

ТВ-трансляция: Zo’rTV.