Англия ЖЧ-2026 учун «ҳайратланарли» таркибни эълон қилди

Англия миллий жамоаси ижтимоий тармоқда 2026 йилги жаҳон чемпионати учун якуний таркибини эълон қилди.

Бош мураббий Томас Тухел бир нечта юлдуз футболчиларни, масалан, ҳимоячилар Ҳарри Магуайр («Манчестер Юнайтед») ва Трент Александр-Арнолдни («Реал Мадрид»), «Челси» яримҳимоячиси Коул Палмерни ва «Манчестер Сити» қанот ҳимоячиси Фил Фоденни таркибга киритмади.

Якуний таркиб Англияда катта норозилик уйғотди. Инглиз оммавий ахборот воситаларида таркибни «шок» деб атамоқда ва мураббий ўз қарори билан ҳайратда қолдираётганини таъкидламоқда.

Тухел танқидга муносабат билдириб, ўз танловига ишонишини таъкидлади. Унинг сўзларига кўра, «истеъдодли эмас, балки энг яхши» таркибни йиғган.

Шуниси эътиборга лойиқки, декабрь ойида Тухел ФИФА томонидан 2025 йилнинг энг яхши футболчиси учун овоз беришда Коул Палмерни Ҳарри Кейндан сўнг иккинчи ўринга қўйган эди.

33 ёшли Магуайр ижтимоий тармоқда Тухелнинг ўзини миллий жамоага чақирмаслик қароридан ҳайратда қолганини ва тушкунликда эканини ёзди. У 2017 йилдан буён Англия миллий жамоасининг асосий ўйинчиларидан бири бўлиб, 2018 ва 2022 йилги жаҳон чемпионатларида, шунингдек, бош мураббий Гарет Саутгейт қўл остида Евро-2024 чемпионатида иштирок этган. У март ойида Уругвай ва Япония билан ўртоқлик ўйинларига чақирилган эди.

1986 йилги жаҳон чемпионатидан бери биринчи марта Англия миллий жамоаси таркибида «Ливерпуль» клубининг бирор футболчиси бўлмайди, деб ёзди Opta. Миллий жамоада 16 та клуб вакиллари тўпланган, фақат 1962 йилги Жаҳон чемпионатида бундан кўп бўлган (17).

Англия миллий жамоасининг тўлиқ таркиби қуйидагича:

дарвозабонлар — Дин Ҳендерсон («Кристал Пэлас»), Жордан Пикфорд («Эвертон»), Жеймс Траффорд («Манчестер Сити»);

ҳимоячилар — Дэн Берн («Ньюкасл Юнайтед»), Марк Гехи («Манчестер Сити»), Рис Жеймс («Челси»), Эзри Конса («Астон Вилла»), Валентино Ливраменто («Ньюкасл Юнайтед»), Нико О'Райли («Манчестер Сити»), Жарелл Куанса («Байер»), Жед Спенс («Тоттенҳэм Ҳотспур»), Жон Стоунз («Манчестер Сити»);

яримҳимоячилар — Эллиот Андерсон («Ноттингем Форест»), Жуд Беллингем («Реал Мадрид»), Эберечи Эзе («Арсенал»), Жордан Ҳендерсон («Брентфорд»), Кобби Майну («Манчестер Юнайтед»), Деклан Райс («Арсенал»), Морган Рожерс («Астон Вилла»);

ҳужумчилар — Энтони Гордон («Ньюкасл Юнайтед»), Ҳарри Кейн («Бавария»), Нони Мадуэке («Арсенал»), Маркус Рэшфорд («Барселона»), Букайо Сака («Арсенал»), Айван Тони («Ал-Аҳлий»), Олли Уоткинс («Астон Вилла»).

Жаҳон чемпионати 11 июндан 19 июлгача АҚШ, Канада ва Мексикада бўлиб ўтади. Англияликлар L гуруҳида Хорватия, Гана ва Панама билан ўйнайди.