GTL заводи дизел ишлаб чиқара бошлаганидан кейин дизел импорти 7 баробарга ошди

Божхона қўмитаси Ўзбекистонга энг кўп импорт бўлаётган товарларга оид маълумотлар базасини ишга туширди. Kun.uz очиқланган маълумотларни ўрганган ҳолда, ёқилғи-энергетика ва нефт маҳсулотлари импорти катта суръатда ошаётганига эътибор қаратди.

Қайд этилишича, 2024 йилнинг январ-июл ойларида 694,2 млн долларлик ёқилғи-энергетика ва нефт маҳсулотлари импорт қилинган. Бу гуруҳдаги товарлар импорти ўтган йилга нисбатан 52,4 фоизга ўсган.

Аввало суюқ ёқилғилар импортидаги аномал юқори ўсиш диққатга сазовор. Ўтган йилнинг январ-июл ойларида 1943 тонна суюқ турдаги ёқилғилар олиб кирилган бўлса, жорий йилнинг шу даврида бу кўрсаткич 19 025 тоннага етган. Ўсиш – 879 фоиз ёки 9,8 баробарга тенг бўлган.

Мазут импорти эса икки баробарга: 416,5 минг тоннадан 843,6 минг тоннага ошган. Ўсиш – 102,6 фоиз.

Январ-июл ойларида Ўзбекистонга 76,4 млн тонна бензин импорт қилинган бўлиб, бу – ўтган йилнинг мос даври (48 млн тонна)га нисбатан 28,4 млн тоннага кўп. Ўсиш – 59,1 фоиз.

Дизел импортида 22,4 фоизлик ўсиш кузатилган: 7 ой давомида бу турдаги ёқилғини олиб кириш ҳажми 169 минг тоннадан 206,9 минг тоннага етган.

Дизел импортини 2022 йилнинг январ-июл ойлари (28,2 минг тонна) билан таққослаганда, ўсиш 7,3 баробар бўлганини кўриш мумкин.

Эътиборлиси, 2022 йил 29 июнда Uzbekistan GTL заводи дизел ишлаб чиқаришни бошлаганди. 3,42 млрд долларга барпо этилган завод йилига 500 млн долларлик импорт ўрнини босувчи маҳсулотлар ишлаб чиқариши кўзда тутилганди.

Статистика агентлиги маълумотларига кўра, 2024 йилнинг биринчи ярмида Ўзбекистонда 499,6 минг тонна дизел ишлаб чиқарилган бўлиб, бу – ўтган йилнинг шу даври (539,4 минг тонна)га қараганда 7,4 фоизга камайган.