GTL zavodi mintaqada neftgaz-kimyo sanoati sohasidagi eng yirik korxona hisoblanadi – Shavkat Mirziyoyev

“Zavodda yiliga 3,6 milliard metr kub tabiiy gaz qayta ishlanib, qiymati 1 milliard dollardan ziyod bo‘lgan 1,5 million tonna tayyor suyuq mahsulotlar, jumladan, bir yilda 307 ming tonna aviakerosin, 724 ming tonna dizel yoqilg‘isi, 437 ming tonna nafta, 53 ming tonna suyultirilgan gaz tayyorlanadi.

Ushbu mahsulotlar hisobiga, yiliga 500 million dollarlik import o‘rni qoplanadi, 200 million dollarlik eksport va 2 trillion so‘mlik soliq tushumlari ta’minlanadi.

Alohida ta’kidlash kerak, biz 300 million dollarlik gazni qayta ishlab, uni qiymati 3 barobar yuqori va dunyo bozorida talab katta bo‘lgan tayyor mahsulotlarga aylantiramiz. 
Buning uchun to‘la asosimiz bor. Chunki bu yerda ishlab chiqarilgan aviakerosin boshqa zavodlar mahsulotiga nisbatan juda toza va sifatli bo‘lib, eng zamonaviy samolyotlarga mo‘ljallangani uchun, unga hamisha talab yuqori hisoblanadi” deya uning so‘zlarini keltirmoqda Kun.uz muxbiri.

Qayd etilishicha, innovatsion texnologiyalar asosida barpo etilgan zavod o‘zini o‘zi energiya bilan ta’minlaydi, ya’ni texnologik jarayonlarda hosil bo‘ladigan bug‘ hisobidan, yiliga 650 million kilovatt-soat elektr energiyasi ishlab chiqariladi. 

Zavodda ishlab chiqarish jarayoni to‘liq avtomatlashtirilgan va texnologiyalarni boshqarish, monitoring va xavfsizlikni ta’minlash kabi muhim jarayonlarga inson omili ta’siri juda kam darajada ekanligi qayd etildi.