«Сити» мавсум стартига ёмон ҳолатда етиб келди. АПЛда ўтган мавсумнинг энг яхши Фоден ҳали бошланғич таркибда ўйнашга тайёр эмас, Англия миллий жамоаси сафида Еврода қатнашган бошқа футболчилар — Стоунз ва Уокер ҳам. Родри эса ўйин қайдномасига ҳам киритилмади — Евро-2024 финалида жароҳат олган испаниялик яримҳимоячи ҳали «Сити» билан бирор машғулот ўтказмади. Мавсумолди йиғинлари вақтида барчанинг эътиборини ўзига қаратган Оскар Бобб эса мавсум старти арафасида жиддий жароҳат олиб, уч-тўрт ойга сафдан чиқди. Натижада Пеп Гвардиола майдон марказига Ковачични, ҳужум қанотларига — Доку ва Савиони жойлаштирди, лекин Доку ўзига бегона бўлган ўнг қанотда тушди.
«Челси»нинг мавсумдаги биринчи ўйин учун таркибини олдиндан тахмин қилиш мумкин эди. Лондонликлар бу ёзда ҳам фаол бўлиб, қатор янги футболчилар сотиб олган бўлса-да, бошланғич таркиб асосан ўтган йил ўйнаган футболчилардан иборат бўлди. Фақат Стерлинг ҳатто захира ўриндиғидан ҳам жой олмагани бироз ажаблантирди. Ҳолбуки у ўтган мавсумда жамоанинг учинчи самарадор футболчиси бўлганди (барча турнирлар доирасида 10+8).
Унинг вакиллари ҳам бундан ҳайрон эканликларини очиқ билдиришди. ОАВ маълумотига кўра, Стерлинг Галлаҳер, Лукаку, Кепа, Чалоба каби клуб хайрлашмоқчи бўлган футболчилар қаторидан жой олган. У катта эҳтимол билан «Юве» ҳужумчиси Киезага алмаштирилади.
Бу ўйинда голни узоқ кутишга тўғри келмади. Доку қанотдан узатма берди, Бернарду Силва тўпга бир тегинишда Ҳоландга йўналтирди, норвегиялик тўпурар эса барча ҳимоячилардан ўзиб кетиб, яқин масофадан дарвозабонни доғда қолдирди. У АПЛда «катта олтилик» вакилларига қарши ўйинларда 22 гол уриб улгурди.
«Челси» «Сити»нинг голигача ҳам, ундан кейин ҳам очиқ футбол намойиш этишга ҳаракат қилди. Ва «Челси»да вазиятлар ҳам бўлди. Мезбонлар уч марта пеналти сўрашди, аммо ҳар сафар ҳакам вазиятларни фол деб топмади. Савио Энцо Фернандес билан тўқнашувда чиндан қўполлик қилганди, аммо бу жарима майдони ташқарисида эди.
Мавзуга оид
«Челси» 44-дақиқада дарвозани ишғол этди, аммо Жексон офсайдда қолгани маълум бўлди. Ўйинда иккинчи бор. Ўтган мавсумда у 28 бор офсайдга тушганди. Ундан кўпроқ кўрсаткич фақат «Ливерпул» ҳужумчиси Нунесда қайд этилган — 33.
Танаффусда Гвардиола Савио ўрнига Фоденни туширди. Бразилиялик вингер дебют ўйинида ҳужумда яхши ҳаракатланди (у аввалига чап қанотда тушганди, аммо кейин Доку билан келишган ҳолда ўз қанотларига қайтишди), аммо ҳимояда бир неча бор позицияни йўқотиб қўйди.
Иккинчи бўлимда икки томон ҳам очиқ футбол намойиш этишга ўтди (умуман, шу куни «Челси» «Сити» жарима майдонида 26 марта тўпга тегинди, бу «Сити» учун жуда кўп. Ўтган мавсумда, барча мусобақалар ҳисобга олинганда ҳам, рақиблар фақат икки марта рақиблар бу кўрсаткичга етиб борган: «Арсенал» ва «Астон Вилла»), тўп Ковачичнинг билагига теккан вазият эса ҳал қилувчи палла бўлди. Ўтган мавсумда ҳакамлар бу ҳолатни тўпни қўл билан ўйнаш деб топиб, пеналти белгилаган бўларди. Жорий мавсумдан эса АПЛ ҳакамларнинг қарорини изоҳлаб борадиган (аммо баҳо бермайдиган) аккаунтни ишга туширди. Бу ҳолатда зарба бериш нуқтаси ва қўл оралиғидаги масофа қисқалиги ҳисобга олингани айтилди (масофа чиндан ҳам катта эмасди). Қолаверса, бу вазиятда тўп аввалига Ковачичнинг оёғига теккани ҳам аҳамиятга эга бўлганди.
Бу эпизоддан кўп ўтмай «Сити» иккинчи голни урди. Бу ишни эса айнан Ковачич амалга оширди. У майдоннинг рақиб томонида тўпни эгаллаб олиб, рақиб жарима майдони томон қаршиликка учрамасдан яқинлашиб борди ва яқин бурчакка кучли зарба берди. «Челси» дарвозабони Санчес яхшироқ ўйнаши мумкин эди, аммо тўпни ўтказиб юборди. Хорватиялик яримҳимоячи эса қўлларини икки ёнга ёйганч, собиқ жамоасига урган голини нишонламаслигини кўрсатди.
Ҳоланд эса ноодатий рекорд ўрнатди. Ушбу форвард 90 дақиқа давомида берган 8 та узатмадан атиги 3 таси аниқчиқди — бу Хосеп Гвардиола қўли остида ўйнаган футболчилар орасида энг минимал кўрсаткич. Шунга қарамай, у голи туфайли ўйиннинг энг яхши футболчиси бўлди.
Шу тариқа, «шаҳарликлар» майдонда ўзига ўхшамаган бўлса-да, қийинчилик билан уч очкони қўлга киритди. «Сити» мавсум стартидаёқ пойгада бўлмаслигини кўрсатмоқда, аммо жамоа иккинчи даврада ғалабалар серияси билан пойгага қўшилиши аниқ.
«Реал» мавсумни 32 учрашувдан иборат рекорд даражадаги мағлубиятсиз серия билан (+24=8) очди ва ўйин бошидаёқ гол ўтказиб юбориш хавфи юзага келди. Аммо Куртуа ажойиб сейв ижро этди, шундан кейин мадридликлар ташаббусни ўз қўлига олди. Жарима майдони ичида Мбаппе тўпни йўқотгандек эди, аммо уни Винисиус Жуниор эгаллаб Олди ва унинг товонда йўллаган пасидан кейин Родриго чиройли зарба билан узоқ бурчакка йўналтирди. Бу унинг учун анъанага айланди, бразилиялик ҳужумчи қаторасига иккинчи мавсумда «Қироллик клуби»нинг чемпионатдаги илк голини урмоқда. Қолаверса, ушбу бразил ла лигада гол+пас тизимида очколари сонини 50 (27+23) тага етказиб, юбилейни нишонлади.
Аммо осонлик билан ҳисоб очилиши туфайли мадридликлар хотиржамликка берилди ва рақиб буни кечирмади. Тўп бурчакдан ошириб берилганида Рюдигер траекторияни ҳисоблашда хатога йўл қўйди, Беллингҳем эса унинг ортини ёпмади ва «иккинчи қават» бўйича мутахассис, баланд бўйли Муричи мувозанатни тиклади. «Реал» эса шундан кейин ўйинни ўзига керакли ўзанга қайтара олмади. Жамоа тўпга эгалик қилди, доимий равишда босим ўтказди, аммо мезбонларни иккинчи марта боши берк кўчага киритиб қўя олмади.
Мбаппе барчасини ўз услубида, чап қанотга кўчган ҳолда ҳал қилишга уринишлари муваффақиятсиз якунланди ва дарвозабонга муаммо туғдира олмади. Модрич майдонга тушиши ўйинга янги импулс бергандек кўринганди, аммо у майдон марказида тўп йўқотганида иккинчи гол ўтказилишига бир бахя қолди. Қаймоқранглилар бахтига Антонио Санчес бир неча дақиқа оралиғида икки бор аниқ зарба йўллай олмади. Карло Анчелотти ўйин охирида Беллингҳем ва Винисиусни майдондан олишга қарор қилиб, янги кучларни ташлаши ҳам ёрдам бермади. Менди эса финал ҳуштаги чалиниши арафасида тушунарсиз ҳаракати билан қизил карточка олди.
УЕФА Суперкубогидаги ғалабадан чалғимаслик керак — «Реал» янги таркибда ўйнашни энди ўрганмоқда, Мбаппе мавсумолди йиғинларининг катта қисмида жамоа билан бирга ишламагани эса вазифани янада қийинлаштиради. Ҳозирча эса Испанияда қизиқарли статистика айланмоқда, унга кўра якшанба кунигача Мадрид жамоаси роппа-роса 20 марта мавсумни дуранг билан бошлаган ва шундан фақат беш ҳолатда чемпион бўла олган. Охирги марта — 18 йил олдин. Бу, албатта, титулни қўлга киритиш эҳтимоли 25 фоизга тушиб кетишини англатмайди, аммо амалдаги чемпионлар учун тахт томон қизил гилам тўшалмаслиги ҳам аниқ.
«Реал Сосиедад» янги мавсумни ўтган мавсумдаги етакчиларининг аксарини таркибда сақлаб қолган ҳолда бошламоқда. Аммо басклар бош мураббийи Иманол Алгуасил ўзи ла лиганинг энг яхши яримҳимоячиси деб атаган Меринони қайдномага киритмади. Бу у «Арсенал»га трансфер қилинаётгани билан боғлиқ. Кубо таркибда қолган, Субименди эса қадрдон клубига садоқатини намойиш этиб, «Ливерпул» таклифини рад этган.
Биринчи турда у захирада қолди ва иккинчи бўлимда майдонга тушиб, қўшимча дақиқаларда ҳисобни қисқартирувчи голга муаллифлик қилди. Биринчи бўлимда эса майдон марказида Мендес билан бирга ёш футболчилар — Урко Гонсалес ва олимпия чемпиони Туррентес ҳаракат қилди. Париж-2024 ўйинларининг яна бир триумфатори Пачеко эса айни вақтда жамоанинг асосий марказий ҳимоячисига айланган, у Европа чемпионлигидан кейин «Атлетико»га йўл олган Ле Норман ўрнини эгаллади. Шундай экан, айтиш мумкинки, Сан-Себастянда навбатдаги авлодлар алмашинуви жараёни бошланган, йўқотишлар клуб академиясининг самарали иши ҳисобига компенсация қилинади.
Ҳозирча эса бу таркибга биргаликдаги ўйин амалиёти етишмаётгани яққол кўриниб қолди. Бундан эса де Фрутос фойдаланиб, ҳимоячилар хатосидан кейин тўпни яқин бурчакка йўллади. Иккинчи бўлим охирларида Камелио мезбонларнинг умидини йўққа чиқарди. Олимпия финали овертаймида икки гол билан ўйин тақдирини ҳал қилган футболчи Пачекодан қочиб кетди ва «Райо»нинг ғалабасини расмийлаштирди.
Антонио Конте ўз тўлқинида: «Неаполда мен яхшироқ вазиятни кўраман деб ўйлагандим. Қандайдир ижобий сюрпризлар кутгандим, аммо мен уларни топишим қийин бўлмоқда. Ўтган йилдан кейин барчасини ташлаб кетиб бўлмайди деб ўйлагандим, аммо бунинг ўрнига биз 9-10 футболчи кетиб қолган вазиятдамиз. Мен қандай қийинчиликларга дуч келишимиз ҳақида аниқ биламан, вазиятни тушуниб турибман ва мен катта бирдамлик кўрсатишни сўрайман. Мен «Наполи»га рақобатбардошликни қайтариш учун қанча вақт талаб этилишини билмайман — 6 ой ёки 3 йил, аммо биз тайёр бўлишимиз керак. Ва таслим бўлмаслигимиз. Биз зўр бўлишимиз талаб қилинади».
Бу янги футболчилар кераклигига аниқ ишора, мураббийнинг фикрича, 10-12 киши олиб келиш керак. Конте бу ҳақда Италия кубоги доирасидаги илк расмий ўйинидан кейин айтганди, ўшанда «Наполи» В серия вакили «Модена»га қарши голсиз дурангдан кейин фақат пеналтилар сериясида ғолиб чиққанди. Нисбатан кучлироқ бўлган «Верона»га қарши ўйинда эса жамоанинг ўйини кучайиб қолмади. Неаполитанликлар биринчи бўлимда кўпроқ вақтда тўпга эгалик қилишди, аммо бу устунлик майдоннинг учинчи қисмида кузатилмади, иккинчи бўлимда эса мезбонлар фаоллашди.
Майдон эгалари ҳужумлар уюштира бошлади ва гол ҳам урилди. Лазович «шведка» услубида қанотдан пас берди, Ливраменто эса Жуан Жезусдан ўзиб кетди. Конте учун севимли бўлган уч марказий ҳимоячидан иборат схема ҳозирча яхши ишламаяпти. Буни иккинчи гол ҳам кўрсатиб берди, Дуда жамоанинг яна бир янги футболчиси — колумбиялик Москерани дарвозабон билан яккама-якка ҳолатга чиқариб юборди. Захирадан ўйинга қўшилган ушбу футболчи қўшимча дақиқаларда яна бир гол урди ва ҳисобни йириклаштирди. Конте янги футболчилар олиб келиш зарурлиги борасида ҳақ: «Наполи» дарҳол таркибни кучайтириши лозим. Антонио қаттиқ истаётган Лукакунинг ўзи билан иш битмайди. Ҳозирча бир нарсани қайд этиш мумкин: совриндор мураббий фаолиятида илк бор А серияда мавсумни мағлубият билан бошлади.
Биринчи турдаги тенденция — етакчи клублар учун қийинчилик бўлмоқда. Шанба кунги ўйинларда «Интер» ҳам, «Милан» ҳам базўр дуранг ўйнаганди. Якшанба куни «Наполи» йирик ҳисобда тор-мор этилди, «Рома» эса Сардинияда рақиб дарвозасига йўл тополмади. Иккинчи бўлимда захирадан тушган Дибала ўйинни жонлантирди, унинг жамоа ёзда амалга оширган энг асосий трансфер - украиналик ҳужумчи Артём Добвик томон юмшоқ узатмаларидан бири голга айланиши эди, аммо бир неча метр масофадан туриб бошда йўлланган зарбадан кейин тўп тўсинга тегди. Бошқа томондан, дарвоза тўсини Свилар тўпнинг йўналишини ўзгартирганида римликларга ҳам ёрдам берди. Бошқа вазиятда Пеллегрини қайтган тўпни дарвозага киритиши бекор қилинди, чунки Добвик зарба берган вақтда у офсайдда қолиб кетганди.
Ижара муддати тугаб, римликлар сафига қайтган Элдор Шомуродов эса қайдномага киритилган бўлса-да, майдонга туширилмади. Жамоа бош мураббийи Даниеле де Росси уни ўз режаларига киритмагани ҳақида хабарлар чиқмоқда. Аввалроқ, Элдор янги мавсумни ижара асосида «Верона»да ўтказиши ёки МЛС иштирокчиси «Аталанта Юнайтед» сафига ўтиши мумкинлиги ҳақида хабар қилинганди.
Кун статистикаси
Орсолини «Болоня» сафида қаторасига етти мавсумда гол урган 2-футболчи бўлди. Бунгача сўнгги 50 йил мобайнида бундай кўрсаткичга фақат Карло Нерво эришганди. Бу футболчи қизил-кўклар сафида ўтган аср охири ва янги аср бошида ўйнаганди.
«Рапид» сўнгги саккиз мавсумдан 7 тасида илк ўйинда ғалаба қозонди. Бу веналиклар клубининг 1984 йилда ўрнатилган ва 1988 йилда такрорланган рекорди такрорланиши бўлди.
«Страсбур» бошланғич таркибидаги 11 футболчидан 10 нафарининг ёши 23 дан кичик бўлди. Бу лига 1 ўйинларида турнир ҳақидаги маълумотлар Opta компанияси томонидан ҳисоблаб бориладиган мавсумдан буён (1947/48) кузатилган илк ҳолатдир.
«Челси» ҳужумчиси Раҳим Стерлинг сўнгги 11 мавсумда илк бор АПЛнинг илк турида иштирок этмади.
«Манчестер Сити» ҳужумчиси Ҳоланд АПЛнинг августдаги ўйинларида урган голлари сонини 13 тага етказди. Норвегиялик ҳужумчи Англиядаги дебютидан буён ёзнинг сўнгги ойида урган голлар сони «Челси» (11) ва «МЮ» (9) бутун таркиб бўлиб урган голлардан кўпроқ.
Яримҳимоячи Саване Франция чемпионатида «Монпеле» учун 41 гол урган. Бу клуб тарихидаги учинчи яхши натижа, Лоран Бланнинг кўрсаткичига яна олти аниқ зарба қолган.
