Талабаликдан тадбиркорликка: уйда балиқ боқиб даромад топаётган Яшнарбек ҳикояси

Яшнарбек Нўмонов ҳовлисидаги ҳовузларда аквариум балиқлари парваришлаб яхшигина даромад топяпти. 30 дона балиқдан иш бошлаган талабанинг бугун ўз бизнеси бор. “2020 йилда Жаҳон иқтисодиёти ва дипломатия университетига ўқишга кирдим. “Контракт”да ўқишим, иқтисодий етишмовчиликлар сабаб ота-онамга ёрдам беришим керак эди. Охир-оқибат тадбиркорликка қўл урдим”, дейди у.

Данғаралик 27 ёшли Яшнарбек бу йил олийгоҳни тамомлади. Эндиликда у ўз соҳасида фаолият юритиш билан бирга декоратив балиқчиликни янада ривожлантирмоқчи.

“Пойтахтда ўқиётган дамларда кун бўйи ўқишда бўлардим, қўшимча иш қилиш қийин эди. Мустақил пул топиб ота-онамга моддий ёрдам бериш учун декоратив балиқчилик соҳасига қизиқиб кўрдим. Ҳовлимизда кичкина ҳовуз қазиб 30 дона балиқ ташладим. Ҳовузларни ўзим қўлда қазиганман, техникага бериш учун ортиқча пул йўқ эди. Бетон ҳовуздан кўра яхшироқ ва арзонроқ бўлгани учун полиэтилен билан қоплаганмиз.

Балиқ боқиш бошида қийин бўлди, чунки бу соҳада чуқурроқ илм, малака талаб этиларди. Ўзбекистонлик балиқчилардан тажриба ўрганмоқчи бўлганимда 35 минг доллар сўрашди. Интернетдан излана-излана, япониялик мутахассис топиб улардан онлайн дарс олдим.

Бошида ишни 1 турдаги балиқ парваришлашдан бошлаган бўлсак, ҳозир 10 хилдан ошиқ балиқ тури мавжуд. Бундан ташқари ҳар бир балиқнинг 3 мингдан зиёд ранги бор.

Япон коиси, Комета, Аранда, Панда аранда, Ранчо каби балиқ турлари парваришлаяпмиз. Нархлари эса 15 минг сўмдан 500 долларгача.

Икки маҳал озуқа берамиз балиқларга, имкон қадар сифатли емлардан фойдаланамиз. Табиий озуқалар ҳам бериб турамиз. Озуқа учун кўп харажат кетмайди, кам овқат ейди, тез катта бўлади.

Сотувга улгуржи қилиб чиқарамиз, доналаб сотилмайди одатда. Балиқ сотиш билан шуғулланадиган мижозларимиз олиб кетишади.

Балиқлар дастлаб иқлимимизга мослашиши қийин кечди, энди эса жонзотлар қишнинг совуғида ҳам, ёзнинг иссиғида ҳам яшай олишади.

Аквариум балиқлари асосан Таиланд, Индонезия, Малайзиядан келади. Баъзида касалликлар келиб туради. Тажрибамизда 20 тадан ортиқ касаллик ўтди, бемалол кураша оламиз бу касалликлар билан. Билишимча, улар экспорт қилишдан олдин балиқларга атай инфекция юқтириб кейин юборишар экан, касалланиб ўлиб, яна экспорт қилишлари учун. Тўғри иш эмас бу, албатта. Биз олиб келган бир балиқ турида ҳам шунақа инфекция аниқланди. 20 кун курашдик касаллик билан, ҳозир яхши бўлиб кетди.

Дипломатия университетини битирдим. Ўз соҳамда ишламоқчиман. Балиқчиликни кенгайтириб, ёшларни ишга олиб, уларнинг бандлигини таъминламоқчиман. Ҳокимлик томонидан 60 сотих ер ҳам ажратилган бунинг учун”, дейди тадбиркор.

Сарвар Зиёев, Kun.uz
Монтаж устаси: Сардор Мамиров