Ўзбекистондан Малайзия бозорига озиқ-овқат маҳсулотлари етказиб берилади

Ўзбекистон дипломатлари Малайзиянинг SRI Ternak Group компаниялар гуруҳи бош директори Раймонд Хо билан учрашув ўтказдилар.

Фото: Дунё

Учрашувда Ўзбекистондан Малайзия бозорига озиқ-овқат маҳсулотлари етказиб бериши мумкин бўлган компаниялар билан ўзаро ҳамкорлик ўрнатиш истиқболлари муҳокама қилинди.

Раймонд Хо компания супермаркетлари расталарида Ўзбекистоннинг сархил ва қуритилган мева-сабзавотлари, қандолат маҳсулотлари ва турли қайта ишланган озиқ-овқатлар ҳам сотилиши мумкинлиги борасидаги режалари билан ўртоқлашди.

Учрашув якунида Ўзбекистон ва Малайзиянинг улгуржи ва чакана савдо компаниялари вакиллари ўртасида онлайн мулоқот уюштириш, Куала-Лумпур шаҳри ёки Селангор штатида SRI Ternak Group компанияси супермаркетларидан бирининг ҳудудида республикада ишлаб чиқариладиган озиқ-овқат маҳсулотлари кўргазмасини ташкил этиш ҳамда мазкур тадбир доирасида иккала мамлакатнинг мазкур соҳаларда етакчи экспортёр ва импортёр компаниялари вакиллари ўртасида B2B учрашувларини ўтказиш бўйича келишувларга эришилди.