Украина Даниядан F-16 қирувчи самолётларининг иккинчи партиясини қабул қилиб олди

Президент Володимир Зеленский қирувчи самолётларни Украинага беришда Даниянинг етакчилигини таъкидлаб, бошқа иттифоқчи давлатларни ҳам ундан ўрнак олишга чақирди.

Дания Украина Қуролли кучларига F-16 қирувчи самолётларининг иккинчи партиясини топширди. Бу ҳақда Украина президенти Володимир Зеленский маълум қилди.

Зеленскийнинг сўзларига кўра самолётлар ҳозир Украинада.

«Биринчи партиядаги самолётлар аллақачон Россия ракеталарини уриб туширмоқда ва одамларимиз, инфратузилмамизни қутқаряпти», — деб ёзади Зеленский ўзининг Telegramʼдаги каналида. Ўз навбатида у қирувчи самолётларни топширишда Даниянинг етакчилигини таъкидлаб, бошқа иттифоқчи давлатларни ҳам ундан ўрнак олишга чақирди.

Укарина ОАВга кўра, Дания жами 19 та F-16 қирувчи самолётларини топширишни режалаштирган.

Дания ва Нидерландиядан ушбу самолётларнинг биринчи партияси етказиб берилиши ҳақида 2024 йилнинг августида хабар берилганди. Ўша ойнинг ўзида битта F-16 йўқотилгани, уни бошқарган тажрибали учувчи Алексей Мес эса ҳалок бўлгани маълум қилинган эди.