ЕЧЛ нимчоракфиналидаги Мадрид дербисининг биринчи раундини «Реал» ўз фойдасига ҳал этди. Турнирнинг амалдаги ғолиби «Атлетико»ни «Сантяго Бернабеу»да мағлубиятга учратди.
Дисквалификацияга учраган Беллингҳем йўқлигида «Реал» 4-4-2 схемасини сақлаб қолди, унинг позициясида Диас туширилди. Тўп жамоада бўлганида Винисиус Жуниор чап қанотда кенгроқ позицияни эгаллади, ўнгда эса Родриого максимум кенглик яратишга ҳаракат қилди. Шу тариқа, Карло Анчелотти шогирдлари «Атлетико» мудофаа чизиғини чўзишга ҳаракат қилди. «Реал»нинг ҳужумдаги қуроли Родриго бўлди – бразилиялик вингерга биргина Галаннинг ўзи қаршилик қила олмади. Шунинг эвазига мезбонлар тўртинчи дақиқадаёқ ҳисобни очишди. Валверде Модрич услубида чизиқлар орасидан пас берди, Родриго рақибнинг ортига отилиб, тўп билан жарима майдони марказига юрди ва айланма зарба билан дарвозани ишғол этди.
Кўп ўтмай, бу усул яна бир бор иш бериши мумкин эди, бу вазиятда бразилиялик вингер яна бир бор Галандан қочиб кетиб, жарима майдончасида йиқилди. Аммо ўйин бош ҳаками Тюрпен пеналти қўйишни истамади. Бу ҳолатда чиндан ҳам «Атлетико» ҳимоячисининг яққол қўполлиги кўринмади. Шундан кейин ҳам «Реал» ўйинни назорат қилишда давом этди, аммо Диего Симеоне жамоаси исталган вақтда қарши ҳужумга ўтиши мумкинлиги билан таҳдид солиб турарди. Валверде икки ҳолатда дарвозага зарба беришга чоғланган рақиблар оёғидан тўпни олиб қўйди.
«Атлетико» футболчилари тўпга эгалик қилганида 3-2-5 схемаси бўйича тизилди ва алоҳида эпизодларда тетик ҳаракат қилди. Ўйиннинг дастлабки ярим соати ортда қолганида эса мухлислар Алвареснинг шедевр голига гувоҳ бўлишди. «Атлетико» форварди қанотда Камавингани осонлик билан ортда қолдириб, олис устун томон айланма зарба берди. Бу Симеоне жамоасида илк зарба эди. Бу вазиятда Галан ҳам ниҳоят фойдали ҳаракат қилди – у Валвердени ўзи билан олиб кетди ва натижада Камавинга ёлғиз қолди.
Эътиборли жиҳати, биринчи бўлимда рақиб жарима майдонида тўпга тегиниш бўйича статистика амалда тенг эди (7:6). Мбаппе бу сафар ўзини кўрсата олмади. Биринчи бўлимда француз «Атлетико» жарима майдонида фақат бир марта тўп билан учрашди, бу ҳам муваффақиятсиз дриблинг билан якунланди.
Мавзуга оид
Иккинчи бўлимда шедеврлар оқшомини Диас давом эттирди. «Атлетико» тенгма-тенг курашган бўлса-да, унинг таркибида ўйинни ҳал қила оладиган футболчилар камроқлигини билиниб қолди. 55-дақиқада Браим чап қанотда комбинация уюштирди ва уни ўзи якунлади: ёш ҳужумчи жарима майдони ичида финти билан Хименесни ноқулай ҳолатга тушириб қўйди ва тўпни олис устун томон юмалатиб юборди.
Ҳисоб 2:1 кўринишига келгач, «Реал» тўпни ўз назоратига олиб, «Атлетико» футболчиларини уни олиш учун югуришга ва катта куч сарфлашга мажбур қилди. Жамоаси жавоб голини уриши зарурлигига қарамай, Симеоне кутилмаганда Гризманни майдондан олди ва унинг ўрнига учинчи марказий ҳимоячини туширди. Афтидан, «Атлетико» қолган вақт ичида учинчи голни ҳам ўтказиб юборишидан хавфсираган, нима бўлганда ҳам ҳали барчасини тузатиш мумкин бўлган уй учрашуви бор.
Сўнгги 15-20 дақиқалик сокин кечди. Аргентиналик мутахассис бор эътиборни ҳимояга қаратиши дерби оловини сўндирди, «Реал» ҳам бир гол устунлигига эгалиги туфайли ортиқча таваккалчилик қилишни истамади. Қўшимча дақиқаларад мезбонлар яхши имкониятга эга бўлишганди, аммо Мбаппе бўш дарвоза қаршисида очилган Винисиусга аниқ пас беролмади.
Якунда зарбалар кўрсаткичи бўйича «Реал» «Атлетико»дан яққол устунликка эришди – 13:6 (дарвоза соҳасига тўғри борган зарбалар бўйича – 7:2, жарима майдони ичидан йўлланган зарбалар бўйича – 7:5). Аммо интрига ҳали тирик – саккиз кундан кейин мухлисларни ҳал қилувчи ўйин кутади.
1/4 финалга жамоалар одатда икки ўйи натижасига кўра чиқишади. «Арсенал» эса бу принципни бузди ва биринчи ўйиндаёқ барчасини ҳал қилди.
Биринчи бўлим воқеаларга бой кечди. Вазиятлардан бирида «Арсенал»га яққол пеналти берилмади. Эдегор жарима майдони ичида зарба беришга чоғланганида, ортдан унинг оёғига контакт бўлди ва норвегиялик футболчининг зарбаси ўхшамади. VAR эса эпизодга аралашмади.
ПСВ 16-дақиқадаёқ ҳисобни очиши мумкин эди, аммо Сайбари етти метр масофадан туриб бўш қолган дарвозани ишғол этолмади, унинг кучли зарбасидан кейин тўп устун ва тўсин туташган нуқтага борди. «Арсенал» дарҳол жавоб қайтарди. 13 дақиқада учта гол билан. Аввалига эйндҳовенликларнинг ашаддий рақиби «Аякс»нинг собиқ футболчиси ҳисобланган нидерландиялик Тимбер олис устун олдида барчадан баланд сакраб, қанотдан оширилган узатмани голга айлантирди. Уч дақиқа ўтиб 18 ёшли Люис-Скеллининг узатмасидан кейин 17 ёшли Нванери ҳисобдаги фарқни оширди, у ЕЧЛ плей-оффида гол урган энг ёш футболчилар учлигига кирди (фақат Боян Кркич ва Жуд Беллингҳем ундан эртароқ гол урган).
Яна 10 дақиқа ўтиб Мерино ҳам ўз номини таблога ёздириб қўйди. Испаниялик яримҳимоячи бу ўйинда ҳам мажбуран марказий ҳужумчи позициясида чиққанди. Ва унга рақиб жарима майдони ичидаги саросима ва тартибсизлик қўл келди, ҳимоячи Фламинго тўпни узоқлаштиришга уриниб, уни тепа олмади ва ўзи йиқилиб тушди, испаниялик эса тўпга эга чиқиб, уни дарвозанинг нариги бурчагига йўналтирди. 30-дақиқадаёқ таблода меҳмонлар фойдасига 3:0 ҳисоби порлай бошлади. Шу дақиқалардаёқ нафақат учрашув, балки 1/4 финал йўлланмаси тақдири ҳал бўлгандек туюлаётганди. Аммо бўлим охирида лондонликлар ҳам мухлисларини асабийлашишга мажбур қилишди.
Бош ҳакам «Арсенал» ҳимоячиси Люис-Скеллини очиқчасига аяди, олдинроқ сариқ карточка олган ушбу ёш ҳимоячи қанотда навбатдаги фолдан кейин майдондан четлатилиши ҳам мумкин эди. Шундан кейин Артета уни 35-дақиқадаёқ алмаштириб юборди.
Биринчи бўлим охирида ПСВ битта гол билан жавоб қайтарди. Бурчак зарбаси ижро этилганида Парти жарима майдони ичида фол ишлатди, Ланг эса пеналтини шу қадар ишонч билан ижро этдики, Райя сакраб ҳам ўтирмади. Шундан кейин ҳам мезбонларда бир қатор яхши вазиятлар бўлди ва агар ҳисоб танаффусгача қисқартирилганида, воқеалар ривожи қандай кечишини тахмин қилиш қийин эди. Аммо иккинчи бўлим бошидаёқ интригага барҳам берилди. «Арсенал» уч дақиқа ичида яна икки гол уриб, ҳисобни йирик кўринишга келтирди.
99 сония ўтиб эса Троссар яккама-якка вазиятга чиқиб бориб, тўпни дарвозабон устидан ошириб ташлади. Шундан кейин ПСВ ўзига кела олмади. Қолган вақт давомида «Арсенал» майдондаги барчасини назорат қилди ва ортиқча куч сарфламай тўпни олиб юрди. Ва шундай ҳолатда ҳам меҳмонлар навбатдаги голга рақибдан кўра яқинроқ эди. Амалда ҳам «Арсенал» олтинчи голни урди. Эдегорнинг жарима майдони ташқарисидан йўллаган зарбаси дарвоза марказига қараб йўналди ва рикошетга ҳам учрамади, аммо ПСВ дарвозабони ўзига келган тўпни тўса олмади. Ҳисоб 1:6 кўринишига келгач, мухлислар стадионни ёппасига тарк этишга киришди.
85-дақиқада эса «Арсенал» еттинчи голни ҳам урди. Эдегор ўз услубида жарима майдони ичига пас берди – ва ҳимоячи Риккардо Калафиори ҳужумчилардек ҳаракатланиб, тўпни олис бурчакка тўғри йўналтирди. Энди 12 март куни Артета иккинчи таркибни тушириши ва чоракфинал учун куч тежаши (бу босқичда «Реал» ёки «Атлетико» рақиб бўлади) ҳам мумкин. Сафардаги 7:1 ҳисоби эса тарихий – бунгача ҳали ҳеч бир жамоа Чемпионлар лигаси плей-оффида сафар учрашувида еттита гол урмаган.
«Боруссия» ўйинни ўзининг энг яхши тўпурари Гирассининг қулай вазиятдан хато зарба бериши билан бошлади. Дортмундликлар фақат бурчак зарбаси ижро этилганида максимал самарадорлик намойиш этишди. Навбатдаги корнердан кейин тўпга эга чиққан Адейеми ҳисобни очди. Бундеслигадаги сўнгги тур қаҳрамони шу қадар кучли ва аниқ зарба бердики, рақиб дарвозабони ўрнидан жилишга ҳам улгурмади. Гросснинг танаффус арафасидаги голи эса ҳисобга олинмади, у тўп узатиб берилаётган вақтда кичик офсайдда қолгани маълум бўлди.
Иккинчи гол ўйин тақдирини ҳал этиши мумкин эди, иккинчи бўлимда эса «Лилл» чинакамига ўз кучини намойиш этди. Французлар — турнирнинг асосий босқичида «Ливерпул»га «Энфилд»да гол урган ягона жамоа бўлганди. Брюно Женезио «Реал» ва «Атлетико»га қарши ўйинларда аралаш таркиб билан ҳам ғалабага эришди. Дортмундда эса унинг шогирдлари тўп аутдан ташланиши билан бошланган комбинацияни гол билан якунлашди. Икки вертикал пас ва Ҳаралдссон аввалига нам газонда тойиб кетгандек кўринган бўлса-да, тўпни дарвоза бурчагига аниқ йўналтирди. Исландиялик ҳужумчи клуб тарихига кирди, чунки бунгача «Лилл» ҳеч қачон ЕЧЛ плей-оффида сафар ўйинларида гол урмаганди. Сафарда очко олишга эришган жамоа энди ушбу жуфтликда фаворитга айланди.
Сешанба оқшоми дастурининг «Брюгге» ва «Астон Вилла» ўртасидаги кечган илк ўйини кутилганидан қизиқарлироқ кечди. Учинчи дақиқадаёқ Бэйли жарима майдонида қайтган тўпни тўхтатмасдан дарвоза бурчагига йўналтирди.
Кўп ўтмай Рэшфорд бирмингҳемликларнинг устунлигини ошириши мумкин эди, аммо Миноле яқин бурчагини ёпди ва жамоадошларини жавоб голи учун илҳомлантирди — 12-дақиқадаёқ мухлислар яна бир чиройли голга гувоҳ бўлишди. Чап қанотга диагонал узатма, Тсолиснинг жарима майдони марказига узатмаси ва де Кайпер тўпга бир тегинишда дарвоза тўрини ишғол этди.
Белгияликларнинг тизимли ўйини меҳмонларга катта қийинчиликлар туғдирди ва улар танаффусга ғолиб ҳолда йўл олиши ҳам мумкин эди. Аммо Эмилиано Мартинес «Аталанта»га қарши ўйин қаҳрамони Талбининг жарима майдони марказидан йўллаган зарбасини тўсди.
Иккинчи бўлимни икки томон ҳам қулай вазиятлардан фойдалана олмаслик билан бошлади. Бир неча дақиқа ичида аввалига «Астон Вилла» рақибни кечирди, кейин эса Ванакеннинг бошда йўллаган зарбаси мўъжиза туфайли дарвозага кирмай қолди. Бироз ўтиб мезбонлар сардори ассистент ролини бажарди, аммо унинг чиройли пасидан кейин Тсолис ўта қулай вазиятдан туриб нотўғри зарба берди. Ўйин охирида эса «Брюгге» мухлислари шок ҳолатига тушишди. Аввалига жамоанинг энг тажрибали ҳимоячиси Меҳеле Роджерснинг қанотдан узатмасидан кейин ўз жамоаси дарвозасига гол уриб қўйиб, бошини чангаллаб қолди.
Кейин эса Тсолис антиқаҳрамонга айланди. Ушбу грециялик ўз жарима майдонида кераксиз вазиятда тўпни тўхтатишда чиройли ҳаракат қилишга уриниб, ўзи истамаган ҳолда фол ишлатди. Белгиланган пеналтини Асенсио аниқ ижро этиб, амалда Унаи Эмери шогирдлари учун чоракфиналга йўлланмани кафолатлади.
«Брюгге» ҳали таслим бўлмади, аммо сўнгги дақиқаларда Ветлессен яна бир қулай вазиятни йўққа чиқармаганида, жавоб ўйинида Белгия чемпионларига осонроқ бўлган бўларди.
