Франция ядровий каллакларга эга қирувчи самолётларини Германия билан чегарага жойлаштиради

Франция президенти Эммануэл Макрон Германия билан чегарада жойлашган Люксей-сен-Совер авиабазасига ташриф буюрди. У 2035 йилга қадар авиабазага ядровий каллакларга эга Rafale қирувчи самолётларини жойлаштириш режалаштирилганини маълум қилди.

«2035 йилда Люксей товушдан тез ядровий каллакларга эга янги модификациядаги Rafale жойлаштириладиган биринчи авиабазага айланади», — дейди Макрон ҳарбийлар олдидаги чиқиши давомида. Елисей саройи президент нутқини Х ижтимоий тармоғи орқали трансляция қилиб борди.

5 март куни Франция халқига мурожаатида Эммануэл Макрон Россия Украинадаги урушни глобал можарога айлантиришга уринаётганини маълум қилганди. У европалик иттифоқчиларига Франция ядровий қуроли ёрдамида ҳимояланишни таклиф қилди. ЕИ давлатлари орасида Германия ҳам ушбу ташаббусни муҳокама қилишга тайёрлигини билдирди.

«Биз ядровий тийиб турувчи қуролларимиз билан ҳимояланамиз. У кенг қамровли, суверен ва тўлиқ французча, — деган Макрон. — Бироқ мен Европа қитъасидаги иттифоқчиларимизни ядровий тийиб турувчи воситаларимиз орқали ҳимоя қилиш борасида стратегик муҳокамаларни бошлашга қарор қилдим».

Ўз навбатида Россия президенти матбуот котиби Дмитрий Песков Макроннинг Европа хавфсизлигини кучайтириш зарурлиги ва Украинанинг урушдаги мағлубиятига йўл қўйиб бўлмаслигини айтган халққа мурожаатини кескин танқид қилди. Песков Макроннинг чиқишини «жуда ва жуда зиддиятли» деб атади.