Эрдўған офиси Истанбул мэрининг ҳисбга олинишига изоҳ берди

Туркия президентининг матбуот хизмати раҳбари Фахриддин Алтун Истанбул мэри Акром Имомўғлининг ҳибсга олинишига изоҳ берди.

«Мустақил суд ҳокимияти томонидан қабул қилинган ҳар қандай қарорни жамоатчиликнинг барча қатлами ҳурмат қилиши керак», — деб ёзади Алтун Х ижтимоий тармоғидаги саҳифасига.

«Истанбул Бош прокуратураси томонидан ўтказилган терговлар доирасида шаҳар мэри идораси мансабдорлари ва бошқа гумонланувчиларни ҳибсга олиш тўғрисидаги қарор қабул қилингандан сўнг айрим доиралар, айниқса, асосий мухолифат партиялари раҳбарлари, сиёсий ва мафкуравий сабаблар билан терговнинг яхлитлигини издан чиқаришга уринаётганини кўряпмиз. Биз турк миллати номидан ўз ваколатларини амалга ошираётган суд органларимизнинг мустақиллигини издан чиқаришга қаратилган бундай уринишларга қатъий қаршилик кўрсатишда давом этамиз», — дейди президент матбуот котиби.

Шунингдек, таъкидланишича, президент идораси «бошланган терговнинг мазмуни ва тафсилотлари билан танишмасдан туриб, сиёсий ва мафкуравий баҳоларга асосланган туҳмат характеридаги айбловлар илгари сурилаётганини» қайд этиб бормоқда.

Бугун, 19 март куни Туркия полицияси Истанбул шаҳри мэри Акром Имомўғлини ҳибсга олди. Шаҳар ҳокимидан ташқари унинг матбуот котиби, шунингдек, шаҳар маъмуриятининг яна 100 га яқин ходими ҳибсга олинган.

2019 йилдан буён Истанбул шаҳри мэри ҳисобланган сиёсатчи ҳибсга олиниши фонида шаҳарда бир нечта йўл ёпилди ва тўрт кун давомида ҳар қандай намойишлар ўтказиш тақиқланди. Шунингдек, NetBlocks мониторинг хизмати хабар беришича, Туркияда X ижтимоий тармоғи (собиқ Twitter), YouTube, Instagram ва TikTok’га кириш чекланган.