Қозоғистонда илк ғалаба, Норвегия Исроилга 4 та гол урди. Европада кун ўйинлари

Сешанба оқшомида Европада ЖЧ-2026 саралаш босқичи доирасида яна учта гуруҳда иккинчи тур учрашувлари бўлиб ўтди.

I гуруҳ

Дирижёр Эдегор

Исроил — Норвегия 2:4
Голлар: Абу Фани (55), Тургеман (90+3) — Волф (39), Сёрлот (59), Айер (65), Ҳоланд (83).
Исроил: Перец, Голдберг (Ревиво 46), Шломо, Нахмиас, Абада (Даса 61), Глух, Соломон, Жобир (Абу-Фани 46), Перец (Битон 61), Перец (Халайли 78), Туржеман.
Норвегия: Нюланд, Волф (Грегерсен 90), Ҳеггем, Айер, Рюэрсон, Берг (Йонсен 75), Берге, Эдегор (Педерсен 90+1), Скеллеруп (Деннум 61), Сёрлот (Ҳеуге 74), Ҳоланд.
Огоҳлантиришлар: Нахмиас (82) – Ҳеггем (31), Сёрлот (72)

Агар голли вазиятлар сонига қаралса, Исроил биринчи турда норвегияликлардан бешта жавобсиз гол қабул қилиб олган Молдованинг аҳволига тушиши мумкин эди. Скандинавларнинг илк ҳужумиёқ хавфли тус олди, аммо Сёрлотнинг зарбасидан кейин тўп дарвоза тўсинига борди. Кейин «Бавария» дарвозабони Перец катта саҳнага чиқди, уни ҳатто Ҳоланд ҳам доғда қолдира олмади, ҳолбуки Эрлинг бир неча бор гол урмаслик қийин бўлган позициялардан туриб ҳужум қилганди. Фақат бўлим охирларига бориб Эдегорнинг ажойиб пасидан кейин ҳимоячи Мёллер Волф нозик ҳаракат билан тўпни дарвозабоннинг ёнидан ўтказиб ҳисобни очди.

Сёрлот яна бир бор устунни нишонга олиши билан бошланган иккинчи бўлим давомида исроилликлар маълум вақтга ташаббусни қўлга олишди. Соломоннинг айёрона зарбасини дарвозабон Нюланн қайтарди, аммо бироз ўтиб Абу Фани рикошет ёрдамида қаторасига иккинчи ўйинда ўз номини таблога ёздириб қўйди. Бу эса акс таъсир кўрсатиб, викингларни уйғотиб юборди ва улар рақиб мудофаасини янчиб ташлади. Бурчак зарбаси ижро этилганида баланд бўйли Сёрлот тўпга сакрамасдан ҳам бош билан дарвозани ишғол этди, учинчи голни урган Айерга эса рикошетлар серияси ёрдам берди.

Кейин эса Ҳоланд миллий жамоа сафидаги юбилей — қирқинчи голини нишонлади. Эрлинг ўз услубида ҳимоячилар ортида очилди, уни шу куни ассистлар бўйича ҳет-трик қайд этган Эдегор голли пас билан таъминлади. «Арсенал» сардори Молдовага қарши ўйинда ҳам учта голда ўз ҳиссасини қўшганди. «Манчестер Сити» форварди эса миллий жамоа сафидаги бу натижага 41 ўйинда эришди, лекин бу терма жамоалар сафидаги фақат иккинчи энг яхши кўрсаткич. Тезкорлик бобида афсонавий Герд Мюллер олдинда, унга дастлабки 40 гол учун 33 ўйин етарли бўлган. Сўнгги йилларда катта турнирлардан четда қолаётган Норвегия эса бу сафар саралаш босқичини қаторасига икки ғалаба билан бошлади.

Молдова — Эстония 2:3
Голлар: Николаэску (67), Каймаков (90+1) — Пеетсон (19), Саппинен (30), Кйят (70).

Миллатлар Лигасида жуда яхши таассурот қолдирган ва С дивизионига кўтарилган Молдова ЖЧ саралашида Норвегияга қарши 0:5 ҳисобидан кейин ўзига кела олмади. Озарбойжонни қуйи лигага жўнатган эстонлар билан ўйин бошидаёқ муаммолар юзага келди. Бешинчи дақиқадаёқ Кожокару «сўнгги умид фоли» учун майдондан четлатилди. Кейин рикошет мезбонлар дарвозабонига қийинчилик туғдирди ва у қайтарган тўп рақиб футболчисининг оёғига бориб тушди. Мезбонларнинг омадсизлиги шундан кейин ҳам давом этди ва бўлим ўрталаридан ўтганда Саппинен корнердан тўпни дарвозабон ҳудудига етказиб берди, аммо дарвозабон тўпни фақат чизиқни кесиб ўтганидан кейин эгаллаб олди. Иккинчи бўлимда эса «10 га 10» форматида (иккинчи огоҳлантириш учун Палуметс четлатилди) молдованлар юлдузи Николаэску ҳисобни қисқартирди, аммо бироз ўтиб Болтиқбўйи жамоаси учинчи голни ҳам урди ва амалда ўйин масаласи ҳал бўлди.

6 июн. Норвегия – Италия, Эстония – Исроил
9 июн. Италия – Молдова, Эстония – Норвегия

J гуруҳ

Лихтенштейн — Қозоғистон 0:2
Голлар: Самородов (42), Марочкин (45). 

Қозоғистон кутилган ғалабага эришди, аммо камтарона Лихтенштейн устидан қозонилган ғалабани оддий деб бўлмайди. Турнир ўйинларида осиёликлар сўнгги бор 2023 йил ноябрида Сан-Маринога қарши ўйинда ғалаба қозонганди. Сешанба оқшомида эса биринчи бўлим охирида «Ахмат» вакили Самородов узоқ кутилган ғалабани таъминлади.

Ушбу футболчи биринчи турда Уэлсга қарши ўйинда қўполлик учун четлатилиши (у рақибнинг оёғига бутсасининг таг қисми билан зарба берган, VAR уни четлатишни сўраган, аммо бош ҳакам бунга қўшилмаганди) ва бугунги ўйинда қатнашмаслиги ҳам мумкин эди. Ўйин қаҳрамони аввалига Бистровнинг узатмасидан кейин ўзи учун одатий бўлмаган тарзда бош билан гол урди, бўлим охирида эса Самородов стандартдан оширган тўпни ҳимоячи Марочкин дарвоза тўрига йўллади.

Шимолий Македония — Уэлс 1:1
Голлар: Миовски (90+1) — Брукс (90+6). 

Гуруҳдаги яна бир учрашув эса сўнгги дақиқаларгача мухлисларни экранлардан узоқлашмасликка мажбур қилди. Дуранг томон кетаётган ўйинни ҳакам томонидан қўшиб берилган дастлабки дақиқада тажрибали Аллен ёндириб юборди. Фахрий футболчи жуда оддий вазиятда тўпни ўз дарвозасига етказиб беришда хато қилди ва Миовски яккама-якка вазиятга чиқиб кетиб, ҳисобни очди. Аммо ҳозирги Уэлс бош мураббийи Крейг Беллами каби иштиёқ билан ўйнамоқда. Британияликлар таслим бўлмади ва қўшиб берилган сўнгги олтинчи дақиқада мағлубиятдан қутулиб қолди. Тўп жарима майдонига етказиб берилганида Мур ҳавода курашда устун келди ва тўп ҳисобни тенглаштирган Бруксга бориб тушди.

6 июн. Уэлс – Лихтенштейн, Шимолий Македония – Белгия
9 июн. Қозоғистон – Шимолий Македония, Белгия – Уэлс

L гуруҳи

Черногория — Фарер ороллари 1:0
Гол: Куч (90+6).

Гибралтар — Чехия 0:4
Голлар: Черни (21), Шик (50), Шулц (72), Климент (90+5). 

Якуни ҳиссиётларга бой бўлган яна бир учрашув Черногорияда бўлиб ўтди, у ерда ҳам қўшиб берилган олтинчи дақиқада Куч рикошетлар сериясидан кейин мезбонларга ғалаба келтирди. Шундай қилиб, Болқон жамоаси Гибралтарни осонлик билан мағлуб этган Чехияни олдинга ўтказиб юбормади, чехлар йирик ҳисобда ғалаба қозонган ўйинда голлардан бири жамоанинг энг яхши тўпурари Патрик Шик томонидан урилди. Чехлар ва черногорияликлар айни вақтда олтитадан очко тўплаган ҳолда гуруҳни бошқармоқда, аммо ёзда гуруҳ фаворити Хорватия ўйинларга қўшилади.

6 июн. Чехия – Черногория, Гибралтар – Хорватия
9 июн. Хорватия – Чехия, Фарер ороллари – Гибралтар