Россия ва Ўзбекистон Трансафғон темирйўли лойиҳаси бўйича ҳамкорликни кенгайтиради

2024 йилда бўлиб ўтган Россия-Ўзбекистон олий даражадаги учрашувлари якунлари бўйича эришилган келишувларни амалга ошириш доирасида Россия Транспорт вазирлиги ва Ўзбекистон Транспорт вазирлиги, шунингдек, «Российские железные дороги» АЖ ва «Ўзбекистон темирйўллари» АЖ ўртасида Трансафғон темирйўли лойиҳасини амалга оширишни бошлаш бўйича ҳужжатлар тўплами имзоланди. Бу ҳақда Россия Транспорт вазирлиги хабар берди.

Таъкидланишича, 2025 йилда Россиянинг ихтисослашган лойиҳа ташкилотлари ўзбекистонлик ҳамкасблари билан биргаликда келишилган йўналишлар бўйича Трансафғон темирйўлини қуриш лойиҳасининг техник-иқтисодий асослари бўлимларини тайёрлашни, шу жумладан юк ташиш ҳажмлари прогнозини ва иқтисодий самарадорликни аниқлашни таъминлайди.

Қайд қилинишича, икки йўналиш аниқланган: «Мозори Шариф – Ҳирот – Дилором – Қандаҳор – Чаман» ва «Термиз – Наибобод – Лўгар – Харлачи».

2025 йил 15-16 май кунлари Қозон шаҳрида бўлиб ўтадиган «Россия - Ислом дунёси» форуми доирасида «Покистон темирйўллари» ва Афғонистон делегацияси иштирокида лойиҳани муҳокама қилиш бўйича биринчи сессия бўлиб ўтади.

Трансафғон темирйўли Марказий Осиёни Афғонистон орқали Жанубий Осиё билан боғлашга қаратилган улкан халқаро инфратузилма лойиҳасидир. Асосий эътибор Ўзбекистон, Афғонистон ва Покистонни боғлайдиган темирйўл қурилишига, мамлакатлар ўртасида янги транспорт йўлагини яратишга қаратилган.

Лойиҳанинг асосий хусусиятлари:

- Йўналиш: Термиз (Ўзбекистон) – Мозори Шариф – Кобул – Пешовар (Покистон);

- Узунлиги: тахминан 760 км, уларнинг катта қисми Афғонистон орқали ўтади.

Лойиҳа мақсади:

- Ўзбекистон ва бошқа Марказий Осиё давлатларининг Араб денгизи портларига (Қарочи, Гвадар) чиқишларини таъминлаш.

- Марказий ва Жанубий Осиё ўртасида юк ташиш вақти ва нархини қисқартириш.

- Минтақавий иқтисодий интеграцияни мустаҳкамлаш.

Лойиҳа иштирокчилари: Ўзбекистон, Афғонистон, Покистон асосий иштирокчи давлатлардир. Осиё тараққиёт банки каби халқаро ташкилотларнинг ёрдами, шунингдек, Россия, Хитой ва Эроннинг ҳамкорлиги ҳам бор.