Жанубий Корея аэропортлар яқинида қушларни назорат қилишни кучайтиради

Қушларни аниқлайдиган ва чўчитувчи моддаларни пуркайдиган махсус дронларни яратиш ва барча аэропортларни улар билан жиҳозлаш режалаштирилган.

Фото: The New York Times

Jeju Air авиакомпаниясининг Boeing 737 самолёти ҳалокатидан сўнг, Жанубий Корея аэропортларни қушлардан ҳимоя қилиш бўйича йирик дастурни эълон қилди. Авиаҳалокатда 179 киши қурбон бўлди, қушларнинг двигателга урилиши бунинг асосий сабаби сифатида кўрилмоқда.

The New York Times хабарига кўра, 2026 йилга бориб, қушларни аниқлайдиган ва чўчитувчи моддаларни пуркайдиган махсус дронларни яратиш, 2028 йилдан эса мамлакатнинг барча аэропортларини улар билан жиҳозлаш режалаштирилган.

Биринчи қадам 2025 йил июнь ойида термал тасвир камераларини ўрнатиш, сўнгра акустик ва лазер тизимларини ўрнатиш бўлади. Расмийлар, шунингдек, хавфсизлик ходимлари сонини кўпайтиришни ва тезкор ҳаракат қилиш учун янги машиналар сотиб олишни режалаштирмоқда.

Jeju Air авиакомпаниясининг Boeing 737 самолёти ҳалокати 2024 йил 29 декабрда Муан шаҳрида рўй берди. Парвоз пайтида экипаж двигателга қуш кириб кетгани ҳақида хабар берган.

Самолёт техник носозлик туфайли фавқулодда ғилдираксиз қўнди, аммо тўхташга улгурмади ва учиш-қўниш йўлаги охирида бетон конструкциялар билан тўқнашиб, ёниб кетди. Самолётнинг иккала двигателида патлар ва қон излари топилди. Бу аэропортда аввал ҳам қушлар билан боғлиқ муаммолар қайд этилган, бироқ жиддий чоралар кўрилмаган эди.

Энди расмийлар ҳимояни нафақат технологик жиҳатдан кучайтириш, балки қушлар учун аэропортлар яқинидаги ҳудудларнинг жозибадорлигини камайтириш, бетон конструкцияларни хавфсизроқ элементлар билан алмаштиришни ҳам режа қилмоқда.