Хитой электромобили ақлбовар қилмас рекорд ўрнатди

Yangwang компанияси U9 гиперкари соатига 472,41 км тезликка эришди.

Фото: Top Gear

Хитойнинг Yangwang компанияси U9 гиперкари соатига 472,41 км тезликка эришиб, серияли электромобиллар учун максимал тезлик бўйича янги рекорд ўрнатганини эълон қилди. Бу ҳақда Top Gear хабар берди.

Рекорд Германияда жойлашган Automotive Testing Papenburg юқори тезликдаги синов йўлагида ўрнатилди. Бунда максимал қуввати ақлбовар қилмайдиган 3000 от кучига эга бўлган U9 Track Edition версиясидан фойдаланилди.

Мустақил мутахассисларнинг таъкидлашича, Yangwang U9 рекорди электромобиллар орасида мутлақ эмас. Гап шундаки, аввалроқ экспериментал Venturi Buckeye Bullet 3 549,4 км/соат тезликка эришган эди. Бироқ у рекорд даражадаги пойгалар учун махсус ишлаб чиқарилган ва серияли автомобил эмас.

Шунингдек, келажакда Yangwang U9 моделининг янада кучлироқ версияси тақдим этилиши мумкинлиги айтилмоқда.

Эслатиб ўтамиз, Yangwang Хитойнинг BYD Auto автогигантининг бўлинмаси бўлиб, гибрид ва тўлиқ электромобиллар ишлаб чиқаришга ихтисослашган. Компаниянинг биринчи Yangwang U8 модели 2023 йил январь ойида Гуанчжоудаги автосалонда тақдим этилган.