АҚШ Қатарга мисли кўрилмаган хавфсизлик кафолатларини тақдим этди

АҚШ президенти Доналд Трамп Қатарга ҳар қандай қуролли ҳужум Қўшма Штатлар тинчлиги ва хавфсизлигига таҳдид сифатида баҳоланиши тўғрисидаги фармонни имзолади. Бу ҳақда The New York Times хабар берди.

Ҳужжатда айтилишича, Вашингтон Қатарнинг ҳудудий яхлитлигини ҳимоя қилиш учун «барча зарур чораларни» - дипломатик, иқтисодий ва керак бўлса, ҳарбий чораларни кўради.

Фармон Исроилнинг Доҳадаги нишонларга берган зарбасидан кўп ўтмай эълон қилинди. 9 сентябр куни амалга оширилган ракета зарбаси оқибатида бир неча киши, жумладан, Қатар хавфсизлик хизмати ходими ҳалок бўлди. Ҳодиса Исроил бош вазири Бинямин Нетаняҳунинг Вашингтонга ташрифига тўғри келди.

Исроил зарбадан афсусдалигини билдирди ва Трамп воситачилигида Қатар расмийлари билан алоқа ўрнатди.

Мутахассисларнинг таъкидлашича, бундай кафолатлар илгари ҳеч бир араб давлатига берилмаган, шунинг учун бу қадам ноёбдир.

Шу билан бирга, фармоннинг юридик кучи масаласи муаллақ қолмоқда: тўлақонли халқаро шартнома учун Сенатнинг маъқуллаши талаб этилади. Шунга қарамай, Вашингтоннинг сигнали Яқин Шарқдаги кескинлик кучайиб бораётган бир пайтда Қўшма Штатларнинг Қатар билан стратегик шерикликни мустаҳкамлаш борасидаги қатъиятини таъкидлайди.