Трамп: Ҳиндистон Россиядан нефт сотиб олишни тўхтатишга ваъда берди

АҚШ президенти Доналд Трамп 15 октябр, чоршанба куни Ҳиндистон бош вазири Нарендра Моди Россия нефтини сотиб олишни тўхтатишга ваъда берганини айтди. Трамп бу «қисқа вақт ичида» амалга ошишини айтди.

«Ҳиндистоннинг [Россиядан] нефт сотиб олишидан норози эдим ва у [Моди] бугун мени Россиядан нефт сотиб олмасликларига ишонтирди», деди Америка президенти Оқ уйда журналистларга.

Трамп бу ваъдани «катта қадам» деб атади. «Энди биз Хитой ҳам худди шундай қилишига ишонч ҳосил қилмоқчимиз», — дея унинг сўзларини келтиради Reuters.

2025 йил апрел ойида Россиядан Ҳиндистонга нефт етказиб бериш, ҳисоб-китобларга кўра, кунига 2,15 миллион баррелгача кўтарилди — 2023 йил май ойидан буён рекорд даражада. Reuters агентлигининг таъкидлашича, Россия кетма-кет учинчи йил Ҳиндистоннинг асосий нефт етказиб берувчиси бўлиб қолмоқда ва унинг импортдаги улуши 36 фоизга етди. Украинада тўлиқ миқёсли уруш бошланганидан бери Россия нефтининг нархи Ҳиндистон нефтни қайта ишлаш корхоналари учун жозибадор бўлди.

14 июл куни Трамп агар 50 кун ичида (2 сентябргача) Украинада тинчлик келишувига эришилмаса, Россиянинг савдо ҳамкорларига 100 фоизлик иккиламчи божлар жорий этиш билан таҳдид қилган эди. 29 июл куни Америка президенти бу муддатни 10 кунга қисқартирди, эртаси куни эса Ҳиндистонга, жумладан, Россия билан савдо учун 25 фоизлик божлар жорий қилди. «Ҳиндистон (...) Хитой билан бир қаторда Россиядан энергиянинг энг йирик харидоридир, шу билан бирга ҳамма Россия Украинада одамларни ўлдиришини тўхтатишини хоҳлайди», деб тушунтирди Трамп.

31 июл куни Ҳиндистоннинг тўртта давлатга қарашли нефтни қайта ишлаш заводи Россиядан нефт сотиб олишни тўхтатгани хабар қилинган эди. Бир ҳафта ичида Россия нефтини мунтазам равишда сотиб олган Индиан Indian Oil, Hindustan Petroleum, Bharat Petroleum ва Mangalore Refinery Petrochemical компаниялари уни сотиб олишга қизиқиш билдирмади, деб хабар берди Reuters. Бироқ, Ҳиндистон оммавий ахборот воситалари ҳукумат манбаларига таяниб, Ҳиндистон нефтни қайта ишлаш заводлари, жумладан, давлатга қарашли IOC, BPCL ва HPCL Россия нефтини харид қилишда давом этаётгани ҳақида хабар берди.