Россиялик блогер Илья Варламов «террорчилар ва экстремистлар» реестрига киритилди

Росфинмониторинг «террорчилар ва экстремистлар» реестрини янгилади. Унга 69 киши, жумладан, блогер Илья Варламов, сиёсатшунос Сергей Медведев ва «Дождь» телеканали бошловчиси Анна Монгайт киритилди.

Уларнинг исмлари ёнида ҳеч қандай белги йўқ, бундан келиб чиқадики, Россия ҳукумати уларни «экстремистик фаолиятга алоқадор» деб ҳисоблайди.

Росфинмониторинг реестрига киритилган одамлар банк операцияларини амалга ошира олмайди - уларнинг Россиядаги ҳисоблари блокланади.

2025 йил август ойида Москва суди Илья Варламовни сиртдан умумий режимдаги 8 йиллик колонияга ҳукм қилиб, блогерни армия ҳақида «фейклар» тарқатиш ва «чет эл агенти» мажбуриятларини бажаришдан бўйин товлаш моддалари бўйича айбдор деб топди. Шунингдек, унга 99,5 миллион рубл миқдорида жарима солинган.

Илья Варламов 2017 йилдан буён ижтимоий тармоқларда шаҳарсозлик, қулай инфратузилма ва сиёсатга бағишланган каналларни юритади. У дунёнинг кўплаб мамлакатларида, шу жумладан Ўзбекистонда ҳам бўлиб, шаҳарсозлик, ободонлаштириш, инфратузилма муаммоларига бағишланган фото ва видео материалларни эълон қилган.

Жумладан, Ўзбекистоннинг катта шаҳарлари ҳокимларига биргаликда сайр қилиб, одамлар муаммоси билан қизиқиб кўришни таклиф қилгани, Самарқандга саёҳат қилгани, у ерда ош егани ҳақида материалларни тайёрлаган. «Ўзбекистон темирйўллари»даги хизмат кўрсатиш сифатини танқид қилган.