Евроиттифоқ Марказий Осиёнинг бир нечта банкларига нисбатан санкция киритди

23 октябр куни Европа Иттифоқи Россияга қарши 19-санкциялар пакетини қабул қилди. Янги санкциялар рўйхатидан Қозоғистон, Тожикистон ва Қирғизистондаги банклар ҳам ўрин олди.

Унга кўра, 12 ноябрдан бошлаб Россиянинг Альфа-банк, МТС банк, Абсолют Банк, Земский банк ва «Истина» нобанк кредит ташкилоти билан кредит операциялари олиб бориш тақиқланади.

ЕИ шунингдек, Россия банкларининг хорижий филиалларига қарши ҳам санкциялар жорий этди – 2 декабрдан бошлаб Беларусда ВТБ, Сбер ва Альфа-Банк, Қозоғистонда эса ВТБ филиаллари санкциялар остида бўлади.

Булардан ташқари, Тожикистоннинг учта («Душанбе Сити банк», «Спитамен» ва «Коммерцбанк Тожикистон») ва Қирғизистоннинг иккита («Толубай» ва «Евросиё жамғарма банки») банки санкциялар рўйхатига киритилди. Уларга нисбатан чекловлар 12 ноябрдан бошлаб кучга киради.

25 ноябрдан Payeer халқаро электрон ҳамёни ва тўлов тизимига нисбатан санкциялар амал қила бошлайди.

Қозоғистон миллий банки раиси ўринбосари Ерулан Жамаубаев ЕИнинг ВТБ Қозоғистон банкига нисбатан санкциялар киритишига изоҳ берар экан, бу иқтисодиёт учун жиддий хатар туғдирмаслигини маълум қилди.