Россияда автомобиллар нархи рекорд даражага етди

Россияда янги енгил автомобилнинг ўртача нархи 2025 йил октябри якунлари бўйича 3,43 млн рублни ташкил этди — бу бозор кузатувлари тарихи давомидаги энг юқори кўрсаткич, дея хабар берди «Автостат» таҳлилий агентлиги 13 ноябр куни ўз сайтида.

Муаллифлар қайд этишича, Россияда янги енгил автомобилларнинг «ўртача нархи» 15 ойдан буён 3 млн рублдан юқори даражада сақланиб келмоқда. Таъкидланишича, ушбу кўрсаткич дистрибютор тавсия қиладиган ўртача нархлар ва ҳар бир моделнинг модификацияларини ҳисобга олган ҳолда сотув ҳажмлари асосида ҳисоблаб чиқилади.

Кузатувчилар ушбу тенденцияни Россияда утилизация йиғими ва ҚҚС миқдорини ошириш режалари туфайли автомобил нархлари кўтарилиши кутилаётган шароитда юзага келган юқори талаб билан боғламоқда.

«Коммерсант» газетаси эса «Авилон» компаниясининг чакана савдо директори Иля Петров фикрини келтиради. У Россияда автомобилларнинг ўртача нархи ўсишини бозорда қимматроқ моделлар улушининг ошиши билан изоҳлайди — ҳам параллел импорт орқали келтириладиган автомобиллар, ҳам Хитой брендлари модел қаторлари ҳисобига.

«Автостат»нинг дастлабки баҳоларига кўра, октябр ойида ишлатилган автомобиллар (ҳайдалган машиналар) учун ўртача нарх ҳам мисли кўрилмаган даражага — 1,23 млн рублга етди. Нашрда таъкидланишича, ушбу тоифадаги машиналар учун кўрсаткич бозор ҳажмлари модел ва ишлаб чиқарилган йил бўйича ҳисобга олинган, аммо модификацияларсиз ҳисобланади.

«Рольф» компаниясининг янги автомобиллар савдоси департаменти директори Николай Ивановнинг фикрича, «йил охиригача автомобил нархлари яна ўсади». «Бироқ автомобилнинг якуний қиймати кескин эмас, тахминан 3–4 фоиз доирасида ўсади», — дея прогноз берди Иванов «Коммерсант» газетасига.