Россия Марказий Осиё давлатлари билан виза режимига ўтиши керак – Миронов

Россиянинг «Справедливая Россия — За правду» партияси раиси Сергей Миронов Россиядаги миграция билан боғлиқ вазият қатъий чоралар кўришни талаб қилишини айтди.

Унинг баёноти «Россия 24» телеканали эфирида янгради, унда сиёсатчи партия патент тизимидан вахта усули фойдасига воз кечишни, мигрант жиноят содир этган тақдирда бутун қариндош уруғини депортация қилишни, шунингдек, Марказий Осиё давлатлари билан виза режимини ўрнатишни таклиф қилаётганини таъкидлади.

«Биз Марказий Осиё давлатлари билан виза режимига ўтишимиз керак. Бизда шунақа жойлар борки, ватандошларимиз у ердан кетишга мажбур бўлмоқда, чунки, халқ тили билан айтганда «келгиндилар эгаллаб олган», ўз урф одатлари ва қонунлари билан яшамоқда. Улар ҳамма нарсага тупуриб қўйган», деди Миронов.

Унинг сўзларига кўра, ҳолат бир неча қатъий чоралар кўрилишини талаб қилади.

«Биринчидан, ишчилар етиб келади, уларга аҳоли пунктида эмас, объект қурилаётган ерда яшаш жойлари барпо этилади. Улар «келди – ишлади - пул топди – кетди» тамойили бўйича яшаши керак. Иккинчидан, агар мигрантлардан кимдир жиноят содир қилса, уни қонун бўйича жазолаш керак, оиласини, қариндош-уруғини эса зудлик билан Россиядан депортация қилиш керак. Ва ниҳоят, Марказий Осиё давлатлари билан виза режимига ўтишимиз керак, менимча, қачонлардир бунга етиб келамиз», деди Миронов.

У мигрантларга қарши қатъий чоралар ҳақида биринчи марта баёнот бераётгани йўқ. Аввалроқ, Миронов ҳозирги миқёсда ва ҳозирги мезонлар бўйича мигрантларнинг оммавий оқимини назарда тутиб, «бундай миграция бизга керак эмас» деган эди. Унинг таъкидлашича, «миллионлаб мигрантларнинг» фақат кичик бир қисми ишчи, қолганлари «шахсий, оилавий сабабларга кўра» келади, бу эса ижтимоий соҳага юк бўлади.