АҚШ Ироқдаги «Лукойл» улушини Америка компаниясига топширишни қўллаб-қувватлади

АҚШ ҳукумати Ироқнинг «Ғарбий Қурна-2» нефт конидаги «Лукойл» улушини Америка компаниясига ўтказиш режасини қўллаб-қувватламоқда, деб хабар беради Bloomberg агентлиги душанба, 8 декабр куни АҚШ Давлат департаменти вакили баёнотига таяниб. Бу америкаликлар томонидан Россия нефт компаниясига нисбатан санкцияларни кучга киритишни маълум муддатга кечиктириш ҳақидаги қарори амалда тугашига бир неча кун қолган бир пайтга тўғри келади.

Қайд этилишича, «Ғарбий Қурна-2» конида Ироқ нефтининг тахминан 10 фоизи қазиб олинади. Нашрга кўра, ўтган ҳафта Ироқ нефт вазирлиги Америка компанияларига ушбу кондаги назорат акция пакетини сотиб олиш таклифини йўллаган.

Қайси корхоналар ҳақида гап кетаётгани бўйича вазирлик маълумот бермади. Бироқ Bloomberg ёзишича, Америка компаниялари, жумладан Exxon Mobil Corp. ва Chevron Corp. «Лукойл» активларини ўз зиммасига олишга қизиқиш билдирган. Агентликнинг номаълум манбаси сўзларига кўра, Ироқ бу ҳолатда Exxon компаниясини афзал кўради, чунки у аввалроқ қўшни «Ғарбий Қурна-1» конини ўзлаштирган.

«Биз Ироқ нефт вазирлиги томонидан Exxon ва Chevron компаниялари билан тузилган дастлабки келишувлардан, шунингдек, яқинда «Ғарбий Қурна-2» конини Америка оператор-компаниясига топшириш мажбуриятидан илҳомландик», — дея Давлат департаменти баёнотидан иқтибос келтиради Bloomberg.

Аввалроқ, 2 декабр куни, Reuters агентлиги Ироқдаги беш аноним манбага таяниб, Exxon компанияси «Ғарбий Қурна-2» конидаги «Лукойл» активларини сотиб олиш бўйича музокаралар олиб бораётганини хабар қилган эди. Ушбу конда «Лукойл» улуши 75 фоизни ташкил қилади, қолган 25 фоиз Ироқнинг North Oil Company компанияси мулки ҳисобланади.

Россиянинг нефт қазиб олувчи «Лукойл» ва «Роснефть» компаниялари, шу жумладан уларнинг 34 та шуъба ва тармоқ корхоналари жорий йил октябрида Россиянинг Украинага қарши уруши давом этаётган бир пайтда АҚШ ва Буюк Британия санкциялари остига тушган.

Шундан сўнг «Лукойл» ўзининг хорижий активларини сотишга қарор қилди. Уларга даъвогар сифатида Швейцариянинг Gunvor компанияси чиқди, унинг асосчиларидан бири Россия президенти Владимир Путиннинг дўсти Геннадий Тимченко ҳисобланади. Вашингтон Gunvor’нинг Москва билан боғлиқлигига ишора қилган ҳолда ушбу битимни тўсиб қўйди ва Украинадаги уруш тугамагунча компанияга бизнес юритиш учун лицензия беришдан бош тортди.

17 ноябр куни Reuters агентлиги хабарига кўра, «Лукойл»нинг айрим хорижий активларини сотиб олиш имкониятини Американинг Chevron компанияси ҳам кўриб чиқмоқда.

АҚШ Молия вазирлиги «Лукойл»га нисбатан санкцияларнинг амал қилишига берилган муҳлатни бир неча бор узайтириб, рус компаниясига хориждаги активларини сотишга имконият беришга уринди. 4 декабр куни АҚШ Молия вазирлиги «Лукойл»нинг Россиядан ташқарида жойлашган ёнилғи шохобчалари фаолиятини 2026 йил 29 апрелига қадар давом эттиришга рухсат берадиган умумий лицензия тақдим этди.