Макроннинг таклифи: Трамп ва Мерц Парижга боришни режалаштирмаяпти

Франция президенти Эммануэл Макрон 22 январ куни Парижда “катта еттилик” (G7) мамлакатлари учрашувини Дания ва Россия иштирокида ўтказишни таклиф қилган, аммо бу ташаббус қўллаб-қувватланмади. Журналистнинг Европага режалаштирилган сафари доирасида Парижга бориш-бормаслиги ҳақидаги саволига АҚШ президенти Доналд Трамп сешанба, 20 январ куни рад жавобини берди. Бундан олдин АҚШ маъмурияти вакили dpa агентлигига Оқ уй раҳбари ҳозирча бундай сафарни режалаштирмаётганини маълум қилган.

Dpa агентлигининг Германия ҳукумат манбаларидан олган маълумотига кўра, Германия канцлери Фридрих Мерц ҳам Макрон таклиф этган куни Франция пойтахтига боришни режалаштирмаяпти. У Давосдаги Жаҳон иқтисодий форумидаги чиқишидан сўнг тўғридан тўғри Брюсселдаги ЕИ саммитига учиб кетади.

Шу куни аввалроқ Доналд Трамп ўзининг Truth Social ижтимоий тармоғида Макрондан келган, деб даъво қилинган хабарлар скриншотларини эълон қилди. У ерда Парижда учрашиш таклифи бор. “Франция президенти Макрондан президент Трампга. Дўстим, биз Сурия масаласида бир хил позициядамиз. Эрон бўйича катта ишлар қилишимиз мумкин. Мен Гренландия масаласида нима қилаётганингни тушунмайман, — дейилади инглиз тилида ёзилган хабарда. — Кел, катта ишлар қилишга уринайлик: 1) мен Давосдан кейин пайшанба куни (22 январ — таҳр.) Парижда G7 учрашувини ташкил қила оламан. Мен украинлар, данияликлар, сурияликлар ва россияликларни таклиф қила оламан. 2) Парижда пайшанба куни, АҚШга қайтишингдан олдин, бирга кечки овқат ташкил қилайлик”. Бу хабар охирида Emmanuel (Эммануэл) деб имзоланган.

Reuters ва AFP агентликларига Франция президенти атрофидаги манбалар Трамп келтирган Макрон хабари ҳақиқий эканини тасдиқлаган.

Трамп чоршанба, 21 январ куни Швейцариянинг Давос шаҳрида бўлиб ўтаётган Жаҳон иқтисодий форумида нутқ сўзлайди. Тадбир доирасида у давлат ва ҳукумат раҳбарлари, шунингдек, бизнес вакиллари билан учрашиш ниятида.

Мерц ҳам АҚШ президенти билан суҳбатда бўлишдан умидвор, аммо бу бўладими-йўқми — ҳозирча номаълум. Брюсселда 22 январ кечқурунга белгиланган ЕИнинг фавқулодда саммитида асосий эътибор Гренландия атрофидаги низога қаратилади. Трамп АҚШ томонидан Гренландияни харид қилиш ниятини, ҳатто зарур бўлса куч ишлатишини ҳам қатъий равишда таъкидлаб келмоқда.