Германия: Москва муросага тайёр бўлмаса, натижа бўлмайди

ГФР ҳукумати Украина, АҚШ ва Россия ўртасидаги уч томонлама алоқаларнинг ўзига ижобий қаради. Бироқ Берлин Москва ўзининг максималистик талабларидан воз кечишга тайёр эканига шубҳа қилмоқда.

Фото: AP

Германия ҳукумати 23 январ, жума куни Абу-Дабида бошланган Украина, АҚШ ва Россия ўртасидаги урушни тўхтатишга қаратилган музокараларга эҳтиёткорона муносабат билдирди. Берлинда таъкидланишича, барқарор тинчлик фақат Москва ҳақиқий муросага тайёр бўлган тақдирдагина ўрнатилиши мумкин.

“Умуман олганда, ҳозир уч томонлама учрашувларга етиб келинса, биз буни қутлаймиз”, — деди ГФР ҳукумати расмий вакилининг ўринбосари Штефан Майер. Шу билан бирга, унинг сўзларига кўра, “Россия ҳақиқатан ҳам ўзининг энг юқори талабларидан қай даражада воз кечишга тайёр” экани бўйича жиддий саволлар сақланиб қолмоқда.

Германия бир неча бор Украина бўйича эҳтимолий тинчлик келишуви узоқ муддатли ва барқарор тинчликка қаратилган бўлиши шартлигини таъкидлаб келади. “Агар тинчлик келишуви охир-оқибат Россия учун фақат нафас ростлаб олиш, кейин эса яна ҳужумларни қайта бошлаш имкониятига айланса, ҳеч нарсага эришиб бўлмайди”, — деди Майер.

Украина, АҚШ ва Россия вакиллари ўртасидаги музокаралар жума куни Бирлашган Араб Амирликлари пойтахти Абу-Дабида бошланди. Россия президенти маслаҳатчиси Юрий Ушаков сўзларига кўра, хавфсизлик масалалари бўйича “уч томонлама ишчи гуруҳ” маслаҳатлашувлари режалаштирилган.

Ушбу учрашув Россия президенти Владимир Путиннинг Москвада АҚШнинг махсус вакили Стив Уиткофф билан музокараларидан, шунингдек Украина президенти Володимир Зеленскийнинг Давосда АҚШ президенти Доналд Трамп билан учрашувидан кейин бўлиб ўтди.

Тайёрлаган: Отабек Матназаров

#Россия #АҚШ #Германия #Украина