«Путин аллақачон Учинчи жаҳон урушини бошлаган» – Зеленский

Украина президенти Володимир Зеленский Россия президенти Владимир Путин аллақачон Учинчи жаҳон урушини бошлагани ҳақида гапирди.

«Мен Путин аллақачон уни бошлаган деб ҳисоблайман. Масала у бу ҳудудларни қай даражада эгаллай олишида. Ва уни қандай тўхтатишда», – деган Зеленский BBC журналисти Жереми Боуэнга берган интервюсида. У «Россия ўз дунёсини олиб келишни ва одамларнинг ўзи ёқтирган ҳаётини ўзгартиришни хоҳлаши»ни қўшимча қилган.

Зеленский Украина РФ ҳукумати талаб қилаётган ҳудудий ён беришларга рози бўлмаслигини яна бир бор таъкидлаган. Россия томони тинчлик музокараларида украин қўшинлари Донецк областининг қолган қисмидан (ҳудуднинг 20 фоиз қисми ҳамон Украина назоратида қолмоқда) ҳам олиб чиқилишини талаб қилмоқда.

«Мен бу масалага шунчаки бошқача ёндашаман. Мен бунга шунчаки ердек қарамайман. Мен бунга шундай қарайман: чиқиш, яъни позицияларимизни заифлаштириш, у ерда қолаётган юз минглаб одамларимизни ташлаб кетиш. Мен бунга мана шундай қарайман. Бундай чиқиш жамиятимизни иккига ажратади», – дейди Украина президенти.

Зеленский Путин талаблари бажарилган тақдирда ҳам тўхтамаслигини таъкидлаган.

«Мен шундай ҳисоблайманки, бу пауза Путинга керак. У нима демасин, ҳақиқат шу. Ва у тикланиб олганида… Европадаги ҳамкорларимиз бу уч-беш йиллик муддат деб ҳисоблайди. Менинг фикримча, у кучларини бир-икки йилда тиклаб олади, ундан кўп эмас. Шунда у қаерга боради? Буни биз билмаймиз. Аммо давом эттиришни хоҳлаши – факт», – деган у тинчликка эришиш учун ҳудудий ён беришларга рози бўлиш тўғри бўлиши мумкинлиги ҳақидаги фикрга жавобан.

Зеленский яна бир бор унинг мамлакати ютқазмаётганини, чунки украинлар мустақиллик учун кураш олиб бораётганини қайд этди. 

Журналист ундан Украинанинг ғалабаси деганда нимани тушуниш кераклигини ҳам сўраган. Зеленскийнинг сўзларига кўра, Украина ғалабаси деганда – украинларнинг нормал ҳаётга қайтиши ва одамлар ўлдирилиши тўхтатилишини, кенгроқ маънода эса – Путиндан бўлаётган глобал таҳдидлар бартараф этилишини назарда тутган.

У Украина ўзининг барча ҳудудларини қайтариб олиши, бу вақт масаласи эканини қўшимча қилган. «Биз буни уддалаймиз. Бу мутлақо тушунарли, вақт масаласи. Аммо буни ҳозир қилмоқчи бўлсак, бу кўплаб одамлар, миллионлаб кишиларни йўқотиш дегани. Чунки уларнинг армияси каттароқ. Биз бундай қадамнинг тўлови катта бўлишини тушунамиз», – деган у.

Шунингдек, Зеленский яна бир бор Украина сайловларни хавфсизлик кафолатланган тақдирдагина ўтказишга тайёрлигини, ўзи яна президентликка номзодини қўйиш-қўймаслигини билмаслиги ҳақидаги гапларни такрорлаган.