Парижда сўл кучлар устун келди: Грегуар мэрликни қўлга киритди

22 март, якшанба куни кечқурун AFP агентлиги муниципал сайловларнинг иккинчи тури натижаларига таяниб хабар қилишича, Парижнинг янги мэри сўл партиялар коалициясидан кўрсатилган 48 ёшли социалист Эммануэл Грегуар бўлади.

Грегуар ўнг марказчи “Республикачилар” партиясидан номзод, Франциянинг собиқ маданият вазири Рашида Датини мағлуб этди. Агентлик эслатишича, Дати сентябр ойида коррупция иши бўйича жавоб бериши керак бўлади. Аввалроқ Франция ҳукумати уни қўллаб-қувватлаётгани ҳақида хабарлар чиққан эди, аммо президент Эммануэл Макрон ОАВдаги у шахсан уни ёқлаб чиққан, деган иддаоларни очиқчасига рад этган.

AFP қайд этишича, Грегуар узоқ вақт давомида Парижнинг амалдаги мэри Анн Идалгонинг “ўнг қўли” бўлиб келган ва у Идалгонинг иқлимни ҳимоя қилиш ва велосипед ҳаракатини ривожлантиришга қаратилган сиёсатини давом эттириш ниятида. Шунингдек, у бўш турган офис биноларини ижтимоий уй-жойга айлантиришни режалаштирмоқда.

Сўл кучлардан яна бир вакил — Марселнинг амалдаги мэри Бенуа Пайан Франциянинг иккинчи энг йирик шаҳрида ҳам қайта сайланишга эришди. У ўнг популист номзод Франк Аллизиони мағлуб этди.

Ўта ўнг қанотдаги “Миллий бирлашув” (RN) партияси жанубий порт шаҳри Тулонда ҳам мағлубиятга учради. У ерда RN'дан номзод Лора Лавалетт узоқ вақт сўровномаларда етакчилик қилиб келган эди. Аммо натижада амалдаги консерватив мэр Жозе Масси ўз лавозимида қолди.

Муниципал сайловлар иккинчи тури якунланганидан сўнг, RN раҳбари Жордан Барделла бу натижани ўз партияси тарихидаги “энг катта илгарилаш” деб атади. Унинг айтишича, мамлакат ўнг кучлари “ўнлаб шаҳарлар”ни қўлга киритган.

RN депутати Лоран Жакобелли ўнг кучлар тахминан 30 та шаҳарда ғалаба қозонганини айтди. Хусусан, гап Франция жанубидаги Оранж, Каркассон, Карпантра, шунингдек мамлакат шимолидаги Левен шаҳри ҳақида бормоқда. Ўнг лагернинг энг катта ғалабаси эса, эҳтимол, мамлакатнинг бешинчи йирик шаҳри бўлган Ниццада бўлиши мумкин.

Франция шарқидаги Арси-сюр-Об шаҳрида халқаро сарлавҳаларга чиққан Иттлер ва Зелински ўртасидаги “дуэл”да партиясиз номзод Шарл Иттлер ғалаба қозонди. Ўта ўнг кучлар қўллаб-қувватлаган Антуан Рено-Зелински эса мағлуб бўлди.

Франциянинг 35 минг муниципалитетининг аксариятида сайлов тақдири биринчи турдаёқ ҳал бўлган эди. Қайта овоз бериш фақат тахминан 1600 та муниципалитетда, асосан мамлакатнинг йирик шаҳарларида ўтказилди.

16 март куни бўлиб ўтган муниципал сайловларнинг биринчи тури натижалари 2027 йил апрелига режалаштирилган Франция президентлик сайловлари олдидан муҳим сиёсий барометр сифатида баҳоланмоқда.

Шу куни Парижда Эммануэл Грегуар 38 фоиз овоз тўплаб, 24 фоиз олган Рашида Датидан ўзиб кетган эди. Қайд этилишича, иккинчи турда Пер-Ив Бурназел (“Горизонтлар”) ва София Шикиру (“Бўйсунмас Франция”) рўйхатлари ҳам иштирок этган.

AFP таъкидлашича, Гавр шаҳрида марказчи “Горизонтлар” партияси вакили Эдуар Филипп, президентлик лавозимига эҳтимолий номзодлардан бири сифатида кўрилаётган сиёсатчи, 16 март куни қарийб 44 фоиз овоз тўплаган ва иккинчи турда якуний ғалабага эришган. У президентлик кампаниясида қатнашиш учун мэр лавозимига қайта сайланишни мажбурий шарт қилиб қўйган эди.

Франциянинг амалдаги президенти Эммануэл Макрон конституциявий чекловлар сабаб 2027 йилги сайловларда иштирок эта олмайди. Le Monde газетаси январ ойида эълон қилган жамоатчилик фикри сўровига кўра, французларнинг тахминан 42 фоизи “Миллий бирлашув” ғояларини қўллаб-қувватлаган. Бошқа сўровлар эса аввалроқ президентлик сайловларида ўта ўнг партия номзоди ғалаба қозониши мумкинлигини башорат қилган эди.