Қурилиш вазирлиги биноси 196 млрд сўмга сотилди. Бу дастлабки хусусийлаштиришдан 14 млрд сўмга юқори нарх

Қурилиш ва уй-жой коммунал хўжалиги вазирлигининг Шайхонтоҳур туманида жойлашган маъмурий биноси аукционда 196,6 млрд сўмга сотилди.

15 май кунги савдо 187,2 млрд сўм бошланғич нарх билан бошланди. Аукцион фақатгина битта нарх таклифидан иборат бўлди ва 10 дақиқа давом этди.

Якунда 196,6 млрд сўмлик таклиф билан «Ҳамкорбанк» АТБ ғолиб бўлди.

Етти қаватли бино Абдулла Қодирий ва Абай кўчалари кесишмасида, Ўрда массиви томонда жойлашган. Бинонинг умумий майдони 11 725 квадрат метрни, унга туташ ҳудуд эса 0,48 гектарни ташкил этади.

Объектда барча коммуникациялар — электр энергияси, газ, сув таъминоти ва канализация мавжуд. Харидор объектни шаҳарсозлик ҳужжатларига мувофиқ офислар ва хизмат кўрсатиш фаолияти учун ишлатиши керак. 

Дастлабки хусусийлаштириш

Қурилиш ва уй-жой коммунал хўжалиги вазирлигининг биноси бундан 5 ой олдин ҳам хусусийлаштирилганди. 16 декабр кунги савдо 130,3 млрд сўм бошланғич нарх билан бошланганди ва 8 та қадамдан иборат бўлиб, 1 соат-у 7 дақиқа давом этганди. Якунда 182,2 млрд сўмлик таклиф билан “O‘zshahar qurilish invest” МЧЖ ғолиб бўлганди.

“O‘zshahar qurilish invest” 2024 йил 26 ноябр ҳолатига давлатники бўлган: компаниянинг 90 фоиз улушига Давлат активларини бошқариш агентлиги, 10 фоизига “Qurilish Invest Development” МЧЖ эгалик қилган. Давактив Kun.uz’нинг ушбу компаниянинг қачон ва қанча нархга хусусийлаштирилгани ҳақидаги саволларини жавобсиз қолдирганди. Сотилган бино нега яна қайта аукционга чиқарилганининг сабаблари маълум эмас.

Аввалроқ Қурилиш вазирлиги Янги Тошкентга кўчиб ўтиши ҳамда у ерда Транспорт ва сув хўжалиги вазирликлари билан битта янги бинода жойлашиши маълум қилинганди.