Qurilish vazirligining binosi 182,5 mlrd so‘mga sotildi

Qurilish va uy-joy kommunal xo‘jaligi vazirligining Shayxontohur tumanida joylashgan ma’muriy binosi auksionda 182,5 mlrd so‘mga sotildi.

16 dekabr kungi savdo 130,3 mlrd so‘m boshlang‘ich narx bilan boshlandi va 8 ta qadamdan iborat bo‘lib, 1 soat-u 7 daqiqa davom etdi.

Yakunda 182,2 mlrd so‘mlik taklif bilan “O‘zshahar qurilish invest” MChJ g‘olib bo‘ldi.

Sotilgan obekt – Abay ko‘chasi 6-uy manzilida, 0,5 gektar yer maydonida joylashgan. Umumiy maydoni – 11 725 kv.m.

Lot shartlariga ko‘ra, xaridor binoda ofis va xizmat ko‘rsatish faoliyatini yo‘lga qo‘yishi lozim.

Avvalroq Qurilish vazirligi Yangi Toshkentga ko‘chib o‘tishi hamda u yerda Transport va Suv xo‘jaligi vazirliklari bilan bitta yangi binoda joylashishi ma’lum qilingandi.

O‘zshahar qurilish invest haqida

Korxona 2017 yilda davlat tomonidan tashkil etilgan bo‘lib, turar joy binolarini qurish bilan shug‘ullanadi. Ustav fondi – 1 mlrd so‘m.

O‘zshahar qurilish invest 2024 yil 26 noyabr holatiga davlatniki bo‘lgan: kompaniyaning 90 foiz ulushiga Davlat aktivlarini boshqarish agentligi, 10 foiziga “Qurilish Invest Development” MChJ egalik qilgan.

Kompaniya keyinchalik xususiylashtirilgan. 2025 yil 16 dekabr holatiga, Qodirov Nuriddin To‘yiyevich korxonaning yagona ta’sischisi hisoblanadi. Rahbar sifatida Saatov Baxtiyor Mamadiyevich ko‘rsatilgan.