Denis Istomin Sankt-Peterburgdagi musobaqa yarimfinaliga chiqish uchun kurashadi

O‘zbekistonning birinchi raqamli erkak tennischisi Denis Istomin Sankt-Peterburgda bo‘lib o‘tayotgan St. Petersburg Open 2015 musobaqasining yarimfinaliga chiqish uchun kurashadi.

Jahonning 62-raqamli tennischisi nemis tennischisi Benjamin Bekkerni 2:6, 7:6 (7:5), 6:4 hisobi bilan mag‘lub etib, musobaqaning chorakfinaliga yo‘l oldi.

Ikki tennischi o‘rtasidagi barcha uchrashuvlardagi hisob Istomin foydasiga 6:1 ko‘rinishini oldi.

Istomin chorakfinalda jahonning 21-raqamli tennischisi avstriyalik Dominik Tim bilan bellashadi. Bu uchrashuv tennischilarning ushbu oydagi ikkinchi uchrashuvi bo‘ladi. Birinchi uchrashuv US Open musobaqasining 2-raundida bo‘lib o‘tgan va unda Istominning uchrashuvni davom ettirishdan voz kechishi sababli Timning qo‘li baland kelgan edi. 

Bu orada Istomin mahalliy jurnalistlarga albatta Ermitaj muzeyiga tashrif buyurishga va'da berdi. “Keyingi haftada Xitoyda musobaqa bor, biroq u biroz kutib tursa bo‘ladi”, deb hazillashib qo‘ydi Istomin.