Gvardiola Angliyadagi jamoalar murabbiylarini bosim ostida qoldirayotgani uchun uzr so‘radi

Myunxenning «Bavariya» klubi bosh murabbiyi Xosep Gvardiola o‘zining Angliya ishlashni istashi borasidagi gap-so‘zlardan keyin ingliz yetakchi klublari murabbiylarining bosim ostiga qolib ketgani uchun uzr so‘radi.

«Men hammasi shunday tus olganidan afsusdaman. Men o‘zimning futbolchilar va murabbiylik faoliyatim davomida ham o‘z hamkasblarimga doimiy ravishda hurmat bilan munosabatda bo‘lib kelganman. Shuning uchun yuzaga kelgan vaziyat uchun murabbiylardan uzr so‘rayman. Menda shunday [boshqa murabbiylarni bosim ostida qoldirish] reja yo‘q edi», deya Gvardiolaning so‘zlaridan iqtibos keltiradi ESPN.

Eslatib o‘tamiz, kataloniyalik mutaxassis mavsum yakuniga yetgach, jamoani tark etadi. U bunga Angliyada ishlashni xohlayotgani bilan izoh bergandi. So‘nggi ma'lumotlarga ko‘ra Gvardiola «Manchester Siti»ni boshqaradi. Biroq, shu kunga qadar uning «Manchester Yunayted», «Chelsi» va «Arsenal» jamoalarini boshqarishi borasida ham turli mish-mishlar tarqalgandi.