Vardining rafiqasi: «Lester» muxlislari meni haqorat qilmasin. Erimning faoliyatini yangi jamoada davom ettirish qaroriga aloqam yo‘q»

«Lester» hujumchisi Jyeymi Vardining rafiqasi Rebeka o‘z erining «Arsenal»ga o‘tayotgani haqidagi xabarlardan keyin darg‘azab bo‘lgan jamoa muxlislariga murojaat qildi.

«Bilib qo‘ying, «Lester» muxlislari, meni haqorat qilmasligingiz kerak. Men erimning qaroriga aloqador emasman. Meni bunda ayblashingiz adolatdan emas», – deb yozgan Rebeka Vardi o‘z tvitterida.

Bundan oldinroq, «Arsenal» Vardini 20 million funt evaziga transfer qilishga kirishgani haqida xabar berildi. Futbolchi londonliklar jamoasi safiga o‘tayotgani haqidagi xabarni «tulkilar» murabbiyi Klaudio Raneri ham tasdiqladi.

29 yoshli futbolchi bugun londonliklar jamoasi bazasida tibbiy ko‘rikdan o‘tadi.

«Arsenal» Vardining transferini Yevro-2016 musobaqasigacha amalga oshirishga shoshilmoqda. Futbolchi dushanba kuni Angliya terma jamoasi bilan Fransiyaga jo‘nab ketadi.