Dunyoda turli xil ko‘rinishda, turli xil avtomobillar ishlab chiqariladi. Yo‘ltanlamas, kupe, xetchbek, sedan...arzoni, qimmati, dabdabalisi...Bu ro‘yxatni davom ettirish mumkin. Biroq, bugungi kunda lyuks toifasidagi avtomobillar orasida Bentli belgisi ko‘pchilikka yaxshi tanish bo‘lib ulgurdi. U so‘nggi yillarda, o‘z toifasida eng ko‘p sotilayotgan avtomobillar ro‘yxatiga yetakchilik qilayapti.
Xo‘sh, ushbu avtomobillar qanday ishlab chiqariladi? Motor.ru sayti xodimlari ushbu transport vositasi ishlab chiqariladigan zavodda bo‘lib, ishlab chiqarish jarayoni bilan bevosita tanishib, tafsilotlari bilan o‘rtoqlashishdi.
Bentley zavodi Buyuk Britaniyaning Kryu shaharchasi yaqinidagi bir paytlar kartoshka ekiladigan dalaga barpo etilgan. Joy tanlashda yirik shaharlardan uzoq bo‘lishiga, ammo avtomobil va temir yo‘llar infratuzilmasi rivojlanganligiga e'tibor qaratilgan. Dastlab zavodni Rolls-Royce kompaniyasining aviatsiya dvigatellarini ishlab chiqarish maqsadida qurishgan. Qurilish ishlari boshlanganidan atigi 5 oy o‘tgach, uning sexidan birinchi 12 silindrli Merlin dvigateli ishlab chiqildi.
Aytish joizki, hozir ham Kryu zavodi 12 silindrli motorlar ishlab chiqaruvchi dunyodagi oz sonli sanoat quvvatlaridan biridir. Biroq, bu dvigatellar samolyotlar uchun emas, balki avtomobillar uchun. Ularning shaklida ham birmuncha o‘zgarishlar yuz bergan. V shaklli motorlar o‘rniga W shakllisi ishlab chiqarilmoqda. Agar siz bu motor Folksvagenniki desangiz, zavoddagilarning barchasidan uzr so‘rashingizga to‘g‘ri kelishi aniq. Hatto, Audi va VW uchun ushbu turdagi motorlar shu yerdan yetkazib beriladi. Faqat, nemislar uchun chiqarilgan atmosferali W12, Bentley mashinasida ikkita turbinaga ham ega bo‘ladi.
Bir qarashda, Kryudagi Bentley korxonasi odatdagi avtomobil zavodi. Biroq, bu yerda juda qimmat mashinalar ishlab chiqariladi. Zavod ichidagi yog‘och va charmga ishlov berish sexlarida bu ayniqsa ko‘zga tashlanadi. Bu yerda har bir jarayon o‘nlab, yuzlab bosqichdan o‘tadi.
Masalan, charm tanlashni olaylik. Agar unda har qanday jiddiy nuqson bo‘lsa, uni hatto orqa o‘rindiqning pastki qismida ham foydalanishmaydi, aksincha tashlab yuborishadi. Agar nuqson unchalik sezilarli bo‘lmasa, asqatib qolishi mumkin. Har doim haydovchi ko‘zi o‘ngida bo‘ladigan panellarga jilo berishda charm albatta eng yuqori talabga javob berishi kerak. Bunda eng murakkab jarayon, salon tomiga munosib va yetarli sifatdagi charmni tanlashdir.
