Yangi Zelandiyada yana 200 ga yaqin qora delfin o‘zini qirg‘oqqa otdi

Yangi Zelandiyada yana 200 ga yaqin qora delfin o‘zini Janubiy oroli sohillariga otdi, deb xabar bermoqda Radio New Zealand radiostansiyasi.

Radiostansiya ma'lumotlariga ko‘ra, tabiiy zaxiralarni muhofaza qilish departamenti xodimi Mayk Ougl bu voqea delfinlarni akula qo‘rqitib yuborgani sababli yuz bergan bo‘lishi mumkinligini aytgan.  

"Delfinlardan birining tanasida akula tishlashidan qolgan kichik, biroq yangi jarohatlar qolgan, shu sababli bu voqea ushbu holat bilan bog‘liq bo‘lishi mumkin", deb aytgan Ougl.

10 fevralda ham 400 ta qora grind-delfinlari shu orol qirg‘oqlariga o‘zini otgandi. Ulardan ko‘pchiligi halok bo‘lgan, biroq delfinlarni qutqarish operatsiyasida ishtirok etgan volontyorlar 100 ga yaqin delfinni sayozlikdan dengizga qaytara olishgan. Kitsimonlar qirg‘oq yaqinida qolmoqdalar, qutqaruvchilar esa qayiqlarda ularga ochiq dengizga suzib ketishlari uchun to‘g‘ri yo‘nalish ko‘rsatishga harakat qilmoqdalar.

Jahon yovvoyi tabiat jamg‘armasining Rossiya dengiz dasturi rahbari Konstantin Zgurovskiyning aytishicha, delfinlar seysmorazvedka va harbiy kemalarning suv osti akustik tizimlaridan garang bo‘lgan yetakchilari ortidan qirg‘oqqa tashlangan bo‘lishlari mumkin.  

Yangi Zelandiya kit va delfinlar o‘zlarini qirg‘oqqa otadigan joyga aylanmoqda. Olimlar hanuzgacha yer sharining turli burchaklarida vaqti-vaqti bilan sodir bo‘ladigan kitsimonlarning bunday ommaviy jonlariga qasd qilishlariga nima sabab bo‘layotganiga aniq javob bera olmayaptilar. Odatda, bir delfin o‘zini qirg‘oqqa otganda, to‘dadagi boshqa delfinlar uni qutqarishga urinib, o‘zlari ham nobud bo‘ladilar.