«Real»dan ketayotgan Pepe o‘ziga munosabat va Zidan haqida gapirdi

«Real» himoyachisi Pepe Madrid klubidan ketishini tasdiqladi.

- Men «Real»da boshqa o‘ynamasligim aniq. O‘tgan vaqt ichida bu klubga borimni berdim.

Men yanvar oyidayoq qaror qabul qilib bo‘lgandim, o‘shandayoq tushungandimki, ishlar yaxshi tomonga ketmayapti. Klubda menga ma'qul bo‘lmagan shartnoma taklif etishdi. Bu klub siyosati — 33 yoshdan oshgan futbolchiga 1 yildan ortiq muddatli shartnoma taklif qilinmaydi.

Meni xursand qiladigani, bu yerda muxlislar meni sevishdi, bu qolgan barchasidan ustundir.

Menda Peres yoki boshqasi bilan muammolar yo‘q. Shunchaki bu bosqich poyoniga yetdi va men buni professionallarcha qabul qildim.

- Zidan yoki Benites?

- Menga Benitesning samimiyligi yoqqan, u rostgo‘y inson edi.

Zidan «Real» bilan erishgan natijalardan hayratlanaman, ammo men tushunmagan ishlar ham bo‘ldi. Masalan, u nima uchun meni jamoadan chetlatdi?

- Keyingi manzil «PSJ»mi yoki Milan?

- Bir qancha takliflar bor. Angliyada faoliyatimni davom ettirish variantlari bor. Ammo hali hech kim bilan kelishuvga erishmadim.

Bundan avvalroq 34 yoshli portugaliyalik bu futbolchi «PSJ» bilan ikki yillik shartnoma imzolashi haqida xabarlar tarqalgandi.

Yakunlangan mavsumda Pepe Primeradagi 13 uchrashuvda maydonga tushdi, 2 gol urdi va bitta golga uzatma berdi.