"Sho‘rtangaz" kimyo majmuasi quvvati 125 ming tonnadan 500 ming tonnagacha oshiriladi

Xalqaro Press-klubda "O‘zbekneftgaz" faoliyati, uning rejalari va amalga oshirilayotgan loyihalariga bag‘ishlangan anjuman bo‘lib o‘tdi. Unda sohaning bir qator yetakchi vakillari hamda ommaviy axborot vositalari xodimlari ishtirok etishdi. Mutaxassislardan biri "Sho‘rtangaz" kimyo majmuiga alohida to‘xtaldi. 

"Loyihalarni tilga olganda yana bir loyihaga to‘xtalmay ilojimiz yo‘q. Bu "Sho‘rtangaz" kimyo majmuasini quvvatlarini oshirish loyihasi. Mazkur loyiha juda ko‘p muzokaralarga sabab bo‘ldi, chunki birinchi marta loyihani boshlaganimizda uning quvvati bor-yo‘g‘i 75 ming tonnaga oshirmoqchi edik. Zero "Sho‘rtangaz" kimyo majmuasining bugungi quvvati 125 ming tonnani tashkil etadi. 

Prezidentimizning tashabbusi bilan shu zavodga xomashyo sifatida UzGTL zavodidan chiqadigan sintetik naftani xomashyo qilib yo‘naltirish takliflari o‘rganib chiqildi. Biz xorijiy davlatlar ekspertlari, qolaversa, o‘zimizning O‘zbekiston Respublikasi Fanlar Akademiyasining yetuk akademiklarini jalb qilgan holda mazkur loyihani o‘rganib chiqdik.

Buning natijasi o‘laroq,  sinetik nafta "Sho‘rtangaz" quvvatini oshirish uchun eng  maqbul xomashyo sifatida tan olindi va u "Sho‘rtangaz" kimyo majmuasi quvvatlarini 125 ming tonnadan 500 ming tonnagacha oshirish imkoniyatini berdi", - deydi "O‘zbekneftgaz" boshqaruv raisi o‘rinbosari. 

Ta'kidlash joizki, "Sho‘rtangaz" zavodi 2001 yilda ishga tushirilgan va uning orqasidan qanchadan-qancha yangi korxonalar ishga tushgan hamda ko‘plab kishilarni ish bilan band qilgan.